Qoraqalpog‘iston Respublikasi, Toshkent va Andijon viloyatlarida ishga hamda o‘qishga kiritib qo‘yish bilan bog‘liq firibgarlik holatlari fosh etildi. Bu haqda Bosh prokuratura huzuridagi departament xabar berdi.
Qayd etilishicha, departamentning Nukus tuman bo‘limi tomonidan DXX va IIV xodimlari bilan hamkorlikda tezkor tadbir o‘tkazilgan. Tadbirda R.N. ismli shaxs fuqaro M.Sh.ning ishonchiga kirib, uni go‘yoki yuqori lavozimda ishlovchi tanishlari orqali Respublika shoshilinch tez tibbiy yordam ilmiy markazi Qoraqalpog‘iston filialiga ishga kiritib qo‘yishi evaziga 40 million so‘mni olgan vaqtida ashyoviy dalillar bilan ushlangan.
Shu kabi, departamentning Nukus shahar bo‘limi tomonidan DXX va IIV xodimlari bilan hamkorlikda o‘tkazilgan tezkor tadbirda fuqaro J.A. fuqaro J.Y.ni tanishlari yordamida 8 million so‘m evaziga “O‘ztemiryo‘lyo‘lovchi” AJ mahalliy yo‘nalishlarda yo‘lovchilarga xizmat ko‘rsatish filialiga ishga kiritib qo‘yishini aytib, oldindan 2,5 million so‘mni olgan vaqtida ashyoviy dillar bilan qo‘lga olingan.
Departamentning Yangiyo‘l tuman bo‘limi tomonidan o‘tkazilgan tezkor tadbirda tuman obodonlashtirish boshqarmasi haydovchisi S.S. fuqaro D.A.ning ishonchiga kirib, uni boshqarma boshlig‘i F.A. orqali ishga kiritib qo‘yishi evaziga 150 dollarni olgan vaqtida ashyoviy dalillar bilan ushlangan.
Departamentning Ulug‘nor tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda Paxtaobod tumani Abu Ali ibn Sino nomidagi Jamoat salomatligi texnikumi xo‘jalik mudiri A.U. fuqaro X.A.ning turmush o‘rtog‘ini ushbu texnikumga o‘qishga kiritib qo‘yishi evaziga 500 dollarni olgan vaqtida ashyoviy dalillar bilan ushlangan.
Mazkur holatlar yuzasidan jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Bundan oldin Nukusda 65 ming dollar evaziga DXXga ishga kiritib qo‘yishni vaʼda qilgan shaxs ushlangani, Qashqadaryoda prokuratura tergovchisi 5 ming dollar pora bilan qo‘lga tushgani to‘g‘risida xabar berilgandi.
Izoh (0)