Poytaxtning Sergeli tumanida 200 dollar pora olgan o‘qituvchiga nisbatan sud hukmi o‘qildi. Bu haqda Toshkent shahar sudlari xabar berdi.
Qayd etilishicha, 2024-yilning yanvar oyida Sergeli tumanidagi maktablarning birida faoliyat olib borayotgan ayol o‘zi ishlayotgan maktabga yuqori lavozimga ishga o‘tkazib qo‘yish uchun fuqarodan 200 dollar olayoganida ushlangan.
Shuncha yillik faoliyatimda bu kabi holat birinchi marta yuz berayotgani, o‘zim tushunmagan holda aralashib qolganimni e’tiborga olishlaringizni so‘rayman, — deydi ayol sudda.
Jinoyat ishlari bo‘yicha Sergeli tuman sudida mazkur holatga bog‘liq ish ko‘rib chiqilgan. Ayblanuvchi Jinoyat kodeksining 59-(bir necha jinoyat sodir etganlik uchun jazo tayinlash), 61-moddalari (jazolarni qo‘shishning hisoblash qoidalari) bilan aybli deb topilib, 1 yil muddatga davlat ta’lim muassasalarining rahbarlik va moddiy javobgarlik yuklatilgan lavozimlarda ishlash huquqidan mahrum qilindi hamda 2 yil 1 oy muddatga ozodlikdan cheklash jazosi tayinlandi.
Bundan oldin Nukusda 65 ming dollar evaziga DXXga ishga kiritib qo‘yishni vaʼda qilgan shaxs ushlangani, Qashqadaryoda prokuratura tergovchisi 5 ming dollar pora bilan qo‘lga tushgani to‘g‘risida xabar berilgandi.
Izoh (0)