Польша мудофаа вазири Владислав Косиняк-Камиш эҳтимолий ўт очишни тўхтатишни мустаҳкамлаш учун Украинага қўшинлар юборишни рад этди. Бу ҳақда Financial Times хабар берди.
“Тинчлик режаси (АҚШнинг сайланган президенти Дональд Трампнинг тинчлик режаси) пайдо бўлганда, биз уни муҳокама қиламиз. Бироқ чегарадош давлатлар Украинага ўз қўшинлари билан кириши керак бўлган мамлакатлар эмас. Чунки мен НАТО доирасида масъулиятни кенг тақсимлаш ва диверсификация қилиш лозим деб ҳисоблайман”, деди вазир.
Нашрнинг эслатишича, Польша Украинани Россиядан ҳимоя қилишда унинг содиқ иттифоқчиси. Бироқ мамлакатлар ўртасидаги муносабатлар тарихий келишмовчиликлар, Украинанинг арзон қишлоқ хўжалиги маҳсулотлари экспорти ва ўз ватанини тарк этган Украина фуқароларининг кўпайиб бораётган норозилиги туфайли кескинлашган.
“Албатта, Польша жамиятида чарчоқ бор, ва бу тушунарли, айниқса бу ерда одамлар ёш украиналик эркакларнинг энг сўнгги машиналарда юришлари ёки беш юлдузли меҳмонхоналарда тўхтаб қолишларини кўришганда”, деди Косиняк-Камиш.
Украина ва Польша ўртасидаги яна бир кескинлик Польшанинг МиГ-29 самолётлари захирасини Украинага етказиб беришдан бош тортиши бўлди. Варшаванинг сўзларига кўра, улар ҳали ҳам ўз хавфсизлиги учун керак.
“Бир томондан, президент Зеленскийни тушунаман, чунки унинг вазифаси доимо кўпроқ ёрдам сўрашдан иборат. Бироқ менимча, у ва Украина шуни ҳам эсда тутишлари керакки, бошқалар фақат каскалар жўнатаётган пайтда, биз танклар юборгандик”, дея таъкидлади Польша мудофаа вазири.
Европа иттифоқи Украинага 100 минггача ҳарбий юбормоқчи
Европа давлатлари ўт очиш тўхтатилганидан кейин Украинага 100 минггача қўшин юборишни муҳокама қилмоқда. Бунда асосий кучларни Франция, Германия, Италия, Польша ва Буюк Британия ҳарбийлари ташкил этиши эҳтимоли юқори. Европа контингентини Украинага юбориш бўйича музокаралар дастлабки босқичда. Аммо мамлакатлар ўртасида аллақачон келишмовчиликлар мавжуд.
Айрим Европа раҳбарлари бу Россия президенти Владимир Путинда музокаралар вақти келгани ва у жанг майдонидаги позициясини сақлаб қолиши мумкинлиги ҳақида таассурот уйғотишни хоҳламайди. Парда ортида баъзи амалдорлар Европа иттифоқи Украинага бера оладиган эҳтимолий кафолатларни ҳам кўриб чиқмоқда.
Изоҳ (0)