Марказий банкнинг Банк назорати қўмитаси 2024 йилнинг декабрь ойидаги йиғилишларида (6 марта) 37 та масалани кўриб чиқди ва тегишли қарорлар қабул қилди. Бу ҳақда банк матбуот хизмати хабар берди.
Маълум қилинишича, рўйхатга олиш ва рухсат бериш йўналишида 27 та масала, шу жумладан, кредит ташкилотлари уставига киритилган ўзгартиришларни рўйхатдан ўтказиш (7 та), янги очилаётган микромолия ташкилотларини ҳисоб рўйхатидан ўтказиш (4 та), кредит ташкилотларининг устав фондидаги улушига эгалик қилиш учун рухсат бериш (7 та), тижорат банклари кузатув кенгаши ва бошқаруви аъзолари ва муҳим аҳамиятга эга ходимларининг номзодларини кўриб чиқиш (7 та) каби масалалар кўрилган.
Шу билан бирга, Банк назорати қўмитасининг тегишли қарорлари билан “Нур Ломбард” МЧЖ таъсисчиси томонидан ломбард фаолиятини тугатиш тўғрисида қарор қабул қилингани сабабли ломбардлар реестридан чиқарилди.
Бундан ташқари, кредит ташкилотларининг молиявий ҳолатига оид 10 та масала — Марказий банкнинг кўрсатмалари ва пруденсиал меъёрлари талабларининг бажарилиши ҳамда тижорат банклари, микромолия ташкилоти ва тўлов ташкилотларида ўтказилган ўрганиш ва текширишлар натижалари ҳам муҳокама қилинган.
Тижорат банклари, микромолия ташкилотлари ва тўлов ташкилотларида ўтказилган ўрганишлар натижасида аниқланган камчиликлар, жумладан, Марказий банкнинг кўрсатмалари ва пруденсиал меъёрлари талабларига, шунингдек, валюта ва ташқи савдо операсияларини амалга оширишда қонунчилик талабларига риоя қилмагани учун 9 та банк, 2 та ломбард ва 1 та микромолия ташкилоти чора ва санкциялар қўлланилиши тўғрисида огоҳлантирилди.
Изоҳ (0)