Markaziy bankning Bank nazorati qo‘mitasi 2024-yilning dekabr oyidagi yig‘ilishlarida (6 marta) 37 ta masalani ko‘rib chiqdi va tegishli qarorlar qabul qildi. Bu haqda bank matbuot xizmati xabar berdi.
Ma’lum qilinishicha, ro‘yxatga olish va ruxsat berish yo‘nalishida 27 ta masala, shu jumladan, kredit tashkilotlari ustaviga kiritilgan o‘zgartirishlarni ro‘yxatdan o‘tkazish (7 ta), yangi ochilayotgan mikromoliya tashkilotlarini hisob ro‘yxatidan o‘tkazish (4 ta), kredit tashkilotlarining ustav fondidagi ulushiga egalik qilish uchun ruxsat berish (7 ta), tijorat banklari kuzatuv kengashi va boshqaruvi a’zolari va muhim ahamiyatga ega xodimlarining nomzodlarini ko‘rib chiqish (7 ta) kabi masalalar ko‘rilgan.
Shu bilan birga, Bank nazorati qo‘mitasining tegishli qarorlari bilan “Nur Lombard” MCHJ ta’sischisi tomonidan lombard faoliyatini tugatish to‘g‘risida qaror qabul qilingani sababli lombardlar reyestridan chiqarildi.
Bundan tashqari, kredit tashkilotlarining moliyaviy holatiga oid 10 ta masala — Markaziy bankning ko‘rsatmalari va prudensial me’yorlari talablarining bajarilishi hamda tijorat banklari, mikromoliya tashkiloti va to‘lov tashkilotlarida o‘tkazilgan o‘rganish va tekshirishlar natijalari ham muhokama qilingan.
Tijorat banklari, mikromoliya tashkilotlari va to‘lov tashkilotlarida o‘tkazilgan o‘rganishlar natijasida aniqlangan kamchiliklar, jumladan, Markaziy bankning ko‘rsatmalari va prudensial me’yorlari talablariga, shuningdek, valyuta va tashqi savdo operasiyalarini amalga oshirishda qonunchilik talablariga rioya qilmagani uchun 9 ta bank, 2 ta lombard va 1 ta mikromoliya tashkiloti chora va sanksiyalar qo‘llanilishi to‘g‘risida ogohlantirildi.
Izoh (0)