Қозоғистон президенти Қосим-Жўмарт Тўқаев амалий ташриф билан Россияга боради. Бу ҳақда президент матбуот котиби Руслан Желдибай ўзининг Facebook’даги саҳифасида маълум қилди.
Маълум қилинишича, Тўқаев 8–9 май кунлари Россияга амалий ташриф билан боради.
“Президент Тверь вилоятида Ржев мемориалини зиёрат қилади ва Иккинчи жаҳон урушининг энг йирик жангларидан бирида ҳалок бўлган 100 ва 101-ўқчи дивизияларнинг қозоқ аскарлари хотирасини ёдга олади”, — деб ёзган Желдибай.
Шунингдек, Тўқаев амакиси Қосим Болтаев дафн этилган Трубино қишлоғидаги оммавий қабрни ҳам зиёрат қилади. Ржев жангида Қозоғистондан чақирилган 22 мингга яқин аскар ва офицер қатнашган.
“9 май куни Россия президенти Владимир Путиннинг таклифига биноан Қосим-Жўмарт Тўқаев Иккинчи жаҳон урушидаги ғалабанинг 78 йиллигига бағишланган парадда иштирок этади. Россия томони тантанали тадбирга МДҲ мамлакатлари раҳбарларини таклиф этган”, — дейди у.
Маълумот ўрнида, Арманистон бош вазири Никол Пашинян ҳам 9 май куни Москвага ташриф буюради ва Путин таклифига асосан ҳарбий парадда иштирок этади
Изоҳ (0)