Қозоғистон президенти Қосим-Жўмарт Тўқаев МДҲнинг тил маконини мустаҳкамлашда рус тилининг ролини шубҳа остига олиш мумкин эмаслигини айтди, деб ёзади «ТАСС».
«Албатта, МДҲда маданий-гуманитар ҳамкорлик ва, тўппа-тўғри қайд этилганидек, тил маконини мустаҳкамлаш ўчмас аҳамиятга эга. Бу ерда рус тилининг ўрнига нисбатан, табиийки, ҳеч қандай шубҳа бўлиши мумкин эмас», — деди Тўқаев МДҲ норасмий саммитида.
Қозоғистон президенти таъкидлашича, «2023 йилда Санкт-Петербургга Ҳамдўстликнинг маданий пойтахти деган расмий мақом берилиши МДҲ мамлакатлари ўртасидаги маданий алоқаларни мустаҳкамлаш йўлида хизмат қилади».
Шунингдек, Тўқаев эслатишича, 2023 йилда Ҳамдўстлик Рус тили йилини нишонлайди ва Қозоғистоннинг МДҲ раҳбарлиги остида Рус тилини қўллаб-қувватлаш бўйича халқаро ташкилот тузиш бўйича ташаббуси амалий жиҳатдан ривожланади.
Санкт-Петербургда МДҲ давлатларининг норасмий саммити бўлиб ўтмоқда. Учрашувда Ҳамдўстликнинг еттита мамлакати — Озарбайжон, Беларусь, Қозоғистон, Қирғизистон, Тожикистон, Туркманистон ва Ўзбекистон президентлари Илҳом Алиев, Александр Лукашенко, Қосим-Жўмарт Тўқаев, Садир Жапаров, Эмомали Раҳмон, Сердар Бердимуҳамедов ва Шавкат Мирзиёев, шунингдек, Арманистон бош вазири Никол Пашинян иштирок этмоқда.
Эслатиб ўтамиз, август ойида Қозоғистон мактабларида 6–7 йил ичида рус тилидан воз кечилиши ҳақида хабарлар тарқалган эди. Кейинроқ бу маълумотни Қозоғистон Таълим вазирлиги рад этган.
Шундан кейин кўп ўтмай, Қозоғистон мактабларида биринчи синфдан бошлаб рус тилини ўрганиш бекор қилинди. Ҳозиргача Қозоғистон мактабларида биринчи синф ўқувчиларига бир вақтнинг ўзида учта тил – қозоқ, рус ва инглиз тиллари ўргатилаётган эди. Эндиликда биринчи синфдан бошлаб болалар фақат қозоқ тилини ўрганади, чунки рус ва инглиз тилларини ўрганиш учун улар аввало ўз она тилида ўқиш ва ёзишни билиши керак.
Шу билан бирга, Халқ таълими вазирининг биринчи ўринбосари Шолпан Каринованинг таъкидлашича, таълим тури қозоқ тилида олиб бориладиган синфларда ҳам, рус тилида олиб бориладиган синфларда ҳам рус тили бир хил режимда ўқитилишда давом этмоқда.
Изоҳ (0)