Кремлда Россия президенти Владимир Путин раислигида МДҲга аъзо давлатлар раҳбарлари кенгашининг навбатдаги йиғилиши бўлиб ўтмоқда.
Давлат раҳбарлари чекланган таркибда қатор масалаларни муҳокама қилади, сўнгра делегациялар аъзолари йиғилишга қўшилади.
Ташкилот ижроия қўмитасида маълум қилинишича, Ҳамдўстлик мамлакатлари етакчилари долзарб минтақавий ва халқаро муаммоларни муҳокама қилади, мамлакатлар ўртасидаги 2025 йилга мўлжалланган ўзаро ҳамкорликнинг асосий масалалари юзасидан фикр алмашади. Кенгаш мажлиси иштирокчилари Россиянинг МДҲга раислиги якунларини сарҳисоб қилади ва эстафетани Тожикистонга топширади.
Россия президентининг ёрдамчиси Юрий Ушаков музокаралар эркин мунозара режимида ўтишини таъкидлаган: иштирокчилар ўзларини қизиқтирган масалалар юзасидан ўз фикрларини билдиришлари мумкин бўлади. Ижтимоий-иқтисодий, маданий-гуманитар, ҳуқуқ-тартибот ва мудофаа соҳаларида ҳамкорликни кенгайтиришга қаратилган кўп томонлама ҳужжатлар имзоланиши режалаштирилган.
Кенгаш йиғилишидан олдин Путин бир қатор икки томонлама учрашувлар ўтказди, жумладан, Озарбайжон президенти Илҳом Алиев ва Арманистон бош вазири Никол Пашинян билан. Музокараларнинг асосий мавзуси Боку ва Ереван ўртасидаги муносабатларни нормаллаштириш масаласи бўлган.
МДҲнинг 2023 йилги саммити ҳам октябрь ойида бўлиб ўтган эди. Ҳамдўстлик мамлакатлари раҳбарлари ўтган йили уюшмага раислик қилган Қирғизистон пойтахти Бишкекда учрашган. Йиғилиш якунлари бўйича 17 та ҳужжат, жумладан, рус тили бўйича халқаро ташкилотни ташкил этиш тўғрисида, кўп қутбли дунёда халқаро муносабатларга оид, давлат бошқарувида рақамлаштириш ва қўллаб-қувватлаш соҳасида ҳамкорлик, рус тилини миллатлараро мулоқот тили сифатида тарғиб қилиш тўғрисида ҳужжатлар имзоланган эди.
Изоҳ (0)