Татаристондаги чорвачилик комплексида юз берган ёнғин оқибатида Ўзбекистоннинг 5 нафар фуқароси ҳалок бўлди. Бу ҳақда Россия Фавқулодда вазиятлар вазирлиги хабар берди.
Маълум қилинишича, Малореченский қишлоғидаги чорвачилик комплексида ишчилар яшаган уй ёниб кетган. Ҳодиса вақти бино ичида 39 киши бўлган. 33 киши мустақил равишда ташқарига чиқиб олган, улардан бири жароҳатланган.
“Ёнғинни ўчириш вақтида ўт ўчирувчилар 6 нафар эркакнинг жасадини топган”, дейилади хабарда.
300 квадрат майдондаги очиқ ёнғинни Россия Фавқулодда вазиятлар вазирлигининг 14 нафар мутахассиси ва 4 та техникаси бартараф этган. Дастлабки маълумотларга кўра, ёнғин электр ускуналаридан фойдаланиш қоидаларини бузиш билан боғлиқ.
15 декабрь куни Ленинград вилояти Всеволод туманидаги ташландиқ бинода ёнғин чиқиши оқибатда Ўзбекистон фуқароси 90 фоиз куйиш билан реанимацияга ётқизилганди. 15 февралда эса Қозоғистоннинг Ақтау шаҳрида содир бўлган ёнғинда ўзбекистонлик фуқаролар жароҳат олганди.
Изоҳ (0)