Саудия Арабистони Соғлиқни сақлаш вазирлиги ҳаво ҳароратининг сезиларли даражада кўтарилиши сабабли ҳаж зиёрачиларига огоҳлантириш берди. Бу ҳақда Al Arabiya хабар берди.
Вазирлик матбуот котиби Муҳаммад ал-Абдулаали юқори ҳарорат “зиёратчиларнинг соғлиғига таҳдид солаётганини” айтди. 14 июнь куни бошланадиган ҳаж мавсуми давомида Маккада ўртача ҳарорат 44 даража бўлиши кутилмоқда. Шу сабабли зиёратчилардан соябон олиб юриш, етарли миқдорда сув ичиш, чарчоқ ва иссиқлик стрессини камайтириш учун маросимлар орасида етарлича дам олиш сўралган.
Қироллик оғир об-ҳаво шароитини ҳисобга олган ҳолда зиёратчилар хавфсизлигини таъминлаш учун барча саъй-ҳаракатларни амалга ошираётгани таъкидланган. Ҳаж зиёратларини бажаришда сувсизланишнинг олдини олиш мақсадида зиёратчиларга ҳар куни етарли миқдорда сув ичиш, мева-сабзавот каби сувга бой таомларни истеъмол қилиш тавсия қилинган.
Ҳаж ва умра вазири доктор Тавфиг ибн Фавзан ар-Рабиянинг айтишича, бутун дунёдан 1,2 миллиондан ортиқ зиёратчилар Саудия Арабистонининг Макка шаҳрига ҳаж амалларини бажариш учун етиб келган. Зиёратчилар ҳаж рухсатномалари бекор қилинмаслиги учун менингококкга қарши вакцина олишлари керак.
Изоҳ (0)