Фарғона вилоятида умра зиёрати учун йўлланма тайёрлаб беришни ваъда қилиб, фуқарони чув туширган шахс қўлга олинди. Бу ҳақда ИИВ ахборот хизмати хабар берди.
Қайд этилишича, Тошкент шаҳар ИИББга ариза билан мурожаат қилган фуқаро Telegram орқали суҳбатлашган номаълум шахс унга 25 дона умра зиёрати учун йўлланма тайёрлашни таклиф қилиб, банк картасига 20 минг 50 долларни ўтказиб олган. Бироқ у берган ваъдасини бажармай яшириниб юрганини маълум қилиб, ушбу шахсга нисбатан қонуний чора кўришни сўраган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тезкор қидирувлар давомида пулларни ўзлаштирган шахс аниқланди.
1996 йилда Фарғона вилоятида туғилган, Олтиариқ тумани ҳудудида яшовчи шахс қўлга олиниб, терговга жалб қилинган. Ҳозирда ушбу шахснинг Тошкент шаҳри ҳудудида содир этилиб, фош этилмасдан қолган бошқа шу турдаги жиноятларга алоқадорлиги текширилмоқда.
Май ойининг бошида Дин ишлари бўйича қўмита Ўзбекистон фуқароларини ҳаж ва умра амалларини бажаришда турли реклама ва эълонлардан эҳтиёт бўлишга чақирганди. “Муборак сафарларга ноқонуний йўллар билан боришга интилиш Саудия Арабистонидан депорт қилиш ва Саудия Арабистонига ҳар қандай виза билан 10 йил муддатга киришни тақиқлаш ҳамда 100 000 саудия риёли (26 минг АҚШ доллари) миқдорида жарима солишга олиб келади”, — дейилганди огоҳлантиришда.
Февраль охирларида Тошкентда Умрага бориш учун авиачипта олмоқчи бўлган 50 киши алдангани, Андижонда Умрага бормоқчи бўлганларнинг 1,4 млрд сўмини ўзлаштирган шахсга жиноят иши қўзғатилгани тўғрисида хабар берилганди.
Изоҳ (0)