Hukumat qarori bilan umra ziyoratini uyushtiradigan firmalar uchun yangi talablar belgilangan edi. Talablar orasida 1 mln dollar miqdordagi mablag‘ni “Ziyorat” jamg‘armasiga zaxira qilib qo‘yish ko‘rsatilgan.
Din ishlari bo‘yicha qo‘mita raisi Sodiqjon Toshboyev litsenziyaning 1 mln dollarlik shartiga izoh berdi. Bu haqda “Kun.uz” nashri xabar berdi.
Qo‘mita raisining aytishicha, bu katta miqdor emas.
“Xabaringiz bo‘lsa kerak, bunga qadar 100 ming dollar qo‘yish [majburiyati] bor edi. O‘shanda 15 mingga yaqin fuqaro Saudiya Arabistonida qolib ketdi, ularning hammasi hukumat tomonidan olib kelindi. Bu haqda biror marta yoritilmadi…
Demoqchimanki, agar 1 million dollar rekvizitga qo‘yiladigan bo‘lsa, havo yo‘llarini 600 dollardan hisoblaydigan bo‘lsak, u yerdagi mehmonxonalar va boshqa xizmatlarning hisobini olsak bu ham [1 million dollar] ming kishiga yetyapti. O‘sha 15 ming kishi bilan muammo bo‘lganida, qo‘yilgan 100 ming dollarga 100 kishini ham qaytarib olib kelishga imkoniyatimiz yo‘q edi”, degan Sodiqjon Toshboyev.
Avvalroq “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonuniga kiritilgan o‘zgartirish va qo‘shimchaga ko‘ra, Umra tadbirlarini tashkil etish va o‘tkazish bo‘yicha xizmatlar ko‘rsatishga doir faoliyat litsenziyalanadigan faoliyatning alohida turi sifatida belgilangan edi.
Bunda, Din ishlari bo‘yicha qo‘mita mazkur sohadagi litsenziyalovchi vakolatli organ sifatida belgilandi. Umra tadbirlarini tashkil etish va o‘tkazish faoliyati uchun litsenziya yakka tartibdagi litsenziya turi hisoblanadi hamda litsenziyalarni berish tanlov asosida Din ishlari bo‘yicha qo‘mita tomonidan 2024-yil 5-oktyabrdan amalga oshiriladi.
Izoh (0)