Сўров ўтказган “Ижтимоий фикр” маркази мазкур ҳолатни шахсий шароит, ижтимоий муаммолар ёки оддийгина байрамларни ҳаётнинг яна бир босқичи сифатида қабул қилиш билан боғлиқ, дея изоҳлаган.
“Ижтимоий фикр” Республика жамоат фикрини ўрганиш маркази Ўзбекистон фуқаролари Янги йил байрамини қандай кайфият ва умидлар билан кутиб олишни режалаштираётганини аниқлаш мақсадида ўтказган социологик сўрови натижаларини эълон қилди.
Сўров натижалари Ўзбекистонда Янги йил болаликдан севимли байрам, анъанавий оилавий қадриятлар ва замонавий тенденцияларнинг ўзига хос уйғунлиги эканини кўрсатган.
Респондентларнинг 90,9 фоизи қарор топган анъаналар ва оилавий қадриятлар билан боғлиқ бўлган Янги 2025 йилни нишонлашни режалаштираётганини, байрамни нишонлашдан бош тортганлар, асосан, ушбу байрамларда ўз иш жойларида, хизматда ёки навбатчиликда бўлишини, шунингдек, Янги 2025 йил келишини нишонлаш истаги йўқлигини билдиришган.
“Қувончли ва кўтаринки кайфият 61,2 фоиз респондентларни қамраб олади, бу катта кўрсаткичдир. Бу натижа шуни кўрсатадики, аксарият ўзбекистонликлар учун Янги йил ижобий, умид ва байрамни кутиш билан боғлиқ...
Бироқ, умумий оптимизмга қарамай, Янги йилни янада вазмин, ҳатто нормал (30,6 фоиз) ёки қайғули кайфият (7,8 фоиз) билан қабул қиладиган одамларнинг кичик бир қисми мавжуд. Бу турли хил шахсий шароитлар, ижтимоий муаммолар ёки оддийгина байрамларни ҳаётнинг яна бир босқичи сифатида қабул қилиш билан боғлиқ”, дейилади “Ижтимоий фикр” маркази хабарида.
Сўровда ўзбекистонликларнинг Янги йилни нишонлашга тайёргарлик кўриш билан боғлиқ муддатларга нисбатан турлича муносабати аниқланган. Қайд этилишича, 44,7 фоиз респондентлар Янги йилдан бир ҳафта олдин байрам тадбирларига тайёргарлик кўришни бошлашади.
“Бу кўпчилик учун одатий ёндашув бўлиб, совғалар танлаш, озиқ-овқат ва заргарлик буюмларини сотиб олиш каби асосий масалалар байрам арафасида ҳал қилинади. Бундай прагматик ёндашув кўп вақт ва пулни беҳуда сарфламасликка ва ҳамма нарсани охирги дақиқагача қолдирмасликка имкон беради”, дея мазкур ҳолат изоҳланган расмий хабарда.
Таъкидланишича, 28,3 фоиз сўралганларнинг тасаввурларида байрам учун зарур бўлган ҳамма нарсани ташкил қилиш учун уларга бир кун кифоя қилади. Улар байрамга айни охирги лаҳзада тайёргарлик кўраётганини тан олишади. 7,3 фоиз сўров иштирокчилари бир ой олдиндан байрамга тайёргарлик кўришни бошлайди, улар совғалар сотиб олишни пухта режалаштиради, уйни безатишни, таомнома тузишни ва байрамнинг бошланишидан анча олдин байрамнинг бошқа жиҳатлари ҳақида ўйлашади. Улар учун байрам олдидан сўнгги кунларда шошма-шошарликдан қочиш ва ташкил қилиш учун ўзларига кўпроқ вақт ажратиш муҳимдир.
Янги йилни нишонлашга олдиндан тайёргарлик кўришни зарур деб ҳисобламайдиган сўралганларнинг улуши 19,2 фоизни ташкил қилади, улар тайёргарликка унчалик аҳамият бермайдилар ёки байрамни кўп ҳаракат қилмасдан нишонлашни афзал кўришади, улар учун тайёргарлик эмас, балки байрамнинг ўзи муҳимдир.
Изоҳ (0)