Бугун, 5 декабрь куни Тошкентда жорий йилги Ўзбекистон парламент сайловлари натижаларини баҳолаш ҳамда янги парламентнинг фуқаролик жамиятининг ислоҳотларни илгари суришдаги ролига бағишланган халқаро анжуман бўлиб ўтди. Иштирокчилар томонидан сиёсий рақобат даражаси, янги парламент таркиби ва унинг мамлакат келажагини шакллантиришдаги ўрни таҳлил қилинди. Тадбирда спикер сифатида қатнашган “Дарё” мухбири Тони Крюгер сайлов натижалари халқ иродасини қанчалик акс эттиргани, янги парламент сиёсий плурализм ва инклюзивлик томон силжишни намойиш қилгани юзасидан ўз муносабатларини билдирди. Иштирокчиларнинг фикрига кўра, Ўзбекистон глобал ва минтақавий интеграцияга интилаётган бир даврда ушбу саволларни атрофлича муҳокама қилиш зарур. 2024 йилги парламент сайловлари ҳал қилиниши лозим бўлган қийинчиликларни ҳам очиб берди.
“Муаммоларни ечиш тараққиётдан дарак, дейди Сенат раисининг биринчи ўринбосари Содиқ Сафоев. — Ҳозирги парламент, пайти келганда мураккаб қарорларни қабул қилишга тайёр давлат органи бўлиши лозим. Вазирлар Маҳкамаси томонидан механизми кейинчалик ишлаб чиқиладиган эмас, тўғридан тўғри ишлайдиган қонунларни қабул қилиш вақти келди ва у албатта, профессионалликни талаб қилади. Германия ва бошқа мамлакатлар тажрибасидан биламизки, бу ниҳоятда мураккаб ҳужжат. Парламент текширувлари ва назоратини нафақат ижтимоий, балки кенгроқ — энергетика, экология, ташқи сиёсат ва хавфсизлик масалалари кўламида яратиш керак ва барча соҳаларда халқ вакиллари ўз овозини билдириши зарур”.
Прогрессив ислоҳотлар маркази томонидан ўтказилган социологик сўров натижалари шуни кўрсатдики, фуқароларнинг сайланган вакиллардан кутганлари билан сайлов натижалари ўртасида сезиларли тафовутлар мавжуд. Сиёсий хилма-хиллик, ижтимоий устуворликларга мослашув ҳамда иқтисодий тенгсизлик, ижтимоий инклюзивлик ва гендер тенглиги каби муҳим масалалар бўйича кучлироқ сиёсат олиб боришга бўлган талаб ортиб бормоқда.
Ўзбекистон сиёсий ислоҳотлар йўлида муҳим ютуқларга эришган бўлса-да, жамоатчилик кутувлари ва халқаро стандартларга жавоб бериш учун яна кўп ишларни амалга ошириш зарур. Мутахассислар парламент фаол ва мустақил институтга айланиши кераклигини таъкидладилар. Бу эса ислоҳотларни нафақат амалга ошириш, балки уларнинг тўғри назорат қилиниши ва баҳоланишини таъминлашни ҳам талаб этади.
Комила Қаландарова тайёрлади.
Изоҳ (0)