“Дарё” кундалигида 7 февраль куни содир бўлган энг муҳим воқеалар
“Дарё” нашри 7 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Туркияда содир бўлаётган зилзила ва унинг кўпайиб бораётган қурбонлари
Туркиядаги фалокатли зилзила қурбонлари сони 3 минг нафардан ошди. Бу ҳақда Milliyet газетаси Фавқулодда вазиятлар бошқармаси маълумотларига таяниб хабар бермоқда. Бундан ташқари 20 мингдан ортиқ киши жабрланган. Айни вазиятда дунёнинг 65 давлати Анқарага ёрдам таклиф қилди.
Сурия Соғлиқни сақлаш вазирлиги ҳам мамлакатда зилзиладан жабр кўрганлар ҳақида маълумот берди. Унга кўра, Сурияда 764 киши ҳалок бўлган, 1 448 киши жароҳатланган. Шу билан бирга, Аl Arabia телеканали Сурияда 1,4 мингдан ортиқ қурбонлар ҳақида ёзмоқда.
Европа Ўрта Ер денгизи сейсмология маркази маълумотларига кўра, 7 февраль куни, Тошкент вақти билан 08:13 да Туркиянинг марказий қисмида 5,3 магнитудали янги зилзила содир бўлган. Зилзила эпицентри Анқарадан 43 км, Бесни шаҳридан 13 км узоқликда жойлашган. Зилзила ўчоғи 10 км чуқурликда.
Туркия фавқулодда вазиятлар бошқармаси ҳам 5,3 магнитудали зилзила ҳақида хабар берган.
Эслатиб ўтамиз, 6 февраль тонгида Туркиянинг Газиантеп шаҳри яқинида 7,5 магнитудали кучли зилзила содир бўлди. Ер силкинишлари яна бир қанча вилоятларда, шунингдек, Сурия ва Ливанда ҳам сезилган. Маълумот учун шу куни Туркия ва яна 6 давлатда қатор зилзилалар қайд этилди.
Икки томонга бўлинаётган Швейцария, Украинага қурол етказиш мамлакат фаровонлигига рахна соладими?
Reuters агентлигининг маълум қилишича, Швейцария Украинага қурол етказиб бериш масаласида бетарафликдан воз кечишга яқин турибди.
Агентликнинг таъкидлашича, мамлакат Германия ва Даниянинг сўровини рад этганидан кейин унга босим кучайган. Айни вазиятда Европа Иттифоқи мамлакатлари Берндан қурол-яроғ реекспорт қилишга қўйилган тақиқнинг юмшатилишини истайди.
Швейцария ҳозирги пайтда ҳарбийларга қурол жўната олмайди. Бундан ташқари, мамлакат Украина ва Россияга нисбатан алоҳида-алоҳида қурол эмбарго киритган.
Швейцария парламентларининг бу борадаги фикрлари иккига бўлинган. Мамлакатнинг ўнг марказчи Эркин демократик партияси етакчиси Терри Буркарт Киевга қурол етказиб беришдан бош тортиш Москвани қўллаб-қувватлашни англатишини айтди. “Биздаги вето ҳуқуқи бошқаларнинг Украинага ёрдам беришига тўсқинлик қилмаслиги керак”, — дейди у.
Сотомо томонидан ўтказилган сўров натижаларига кўра, мамлакатдаги сайловчиларнинг 55 фоизи Украинага қурол-яроғ реекспорт қилинишигаъ рухсат бериш тарафдори.
Шу билан бирга, Швейцария Халқ партияси депутати Девид Субербюлер қуролли тўқнашувда иштирок этаётган давлатга қурол жўнатишига рухсат бериш Швейцариядаги “тинчлик ва фаровонлик пойдеворини йўқ қилишини” айтмоқда.
Украина президенти Европа иттифоқи етакчилари билан учрашади, бу Украинага босқиндан кейин Европага қилинадиган иккинчи сафар
Европа Кенгаши раҳбари Шарл Мишел Украина президенти Владимир Зеленскийни 9—10 февраль кунлари Брюсселда бўлиб ўтадиган Европа Иттифоқи етакчилари саммитида шахсан иштирок этишга таклиф қилди. Бу ҳақда Мишелнинг вакили Баренд Лейц Twitter’да маълум қилди.
“Хавфсизлик нуқтаи назаридан, бошқа маълумотлар берилмайди”, — деган вакил.
Агар Зеленский Брюсселга келса, бу унинг Украинага кенг миқёсли босқиндан кейин, мамлакатдан ташқарига иккинчи сафари бўлади. Уруш бошланганидан бери унинг ягона хорижий ташрифи 2022 йил декабрь ойида Вашингтонга бўлган. Ўшанда Зеленский АҚШ президенти Жо Байден билан учрашган ва Конгресснинг қўшма йиғилишида нутқ сўзлаган.
Financial Times Украина президентининг Брюсселга ташрифи хавфсизлик нуқтаи назаридан бекор қилиниши мумкинлигини таъкидлади, буни Зеленскийнинг ўзи ўтган ҳафта журналистлар билан суҳбатда ҳам айтиб ўтганди.
Ўрта Чирчиқ туманидаги умумтаълим мактабини хусусий мактабга айлантирилиши атрофидаги можаролар ва кутилаётган ечим
Ижтимоий тармоқларда Тошкент вилоятининг Ўрта Чирчиқ туманидаги 20-мактаб президент мактабига айлантирилгани, маҳаллий аҳоли фарзандлари бошқа ҳудуддаги мактабга мажбурий тарқатилгани ҳақида хабар берилганди. Тошкент вилояти ҳокимлиги мазкур муаммога муносабат билдирди.
Ҳокимликнинг расмий хабарида, ушбу умумтаълим мактаби туман ҳокими қарори асосида тугатилгани ва бино ихтисослаштирилган мактабга айлантирилгани айтилган. Таъкидлашларича, 20-мактаб ўқувчилари мактаб биноси ҳудудидан 1 км узоқликдаги 49-мактабга жойлаштирилган.
Расмий хабарда қўшимча қилинадики, шу йил туман инвестиция дастури доирасида “Тараққиёт” маҳалласи учун алоҳида мактаб биноси қурилиши режалаштирилган.
Вилоят ҳокими топшириғи билан туман ҳокими Ихтиёр Қосимов ва вилоят ҳокимининг матбуот котиби аҳоли билан учрашди. Ота-оналарга ҳолат бўйича тушунтириш берилди”, — дейилади ҳокимлик хабарида.
“Ота-оналар эса бундан норози, яқинда 12 ёшли ўқувчи қиз билан содир бўлган мудҳиш воқеа уларни қўрқитиб қўйган. Шу сабабли 400 нафарга яқин ўқувчи айни пайтда мактабга бормаяпти”, — дейилади бу ҳақдаги хабарлардан бирида.
