Болалар омбудсманига 6 декабрь куни Самарқанд вилоятида яшовчи вояга етмаган Ф.У. (2010 йилда туғилган қиз бола) мурожаат (телефон алоқа орқали) қилди. Бу ҳақда болалар омбудсмани матбуот хизмати хабар берди.
Маълум қилинишича, вояга етмаган қиз ўз мурожаатида ота-онасининг бир неча йил аввал ажримидан сўнг ҳозирда отаси билан алоқа йўқлиги, онаси ва акаси эса бугунги кунда жиноий таъқиб остида бўлиб, уларга тергов вақтида қамоқ эҳтиёт чораси қўллангани сабабли ҳозирда у мутлақо ёлғиз қолганлигини билдирган.
Ҳолат болалар омбудсмани томонидан дарҳол ўрганилди. Хусусан, Ижтимоий ҳимоя агентлигига дарҳол киритилган сўров асосида бундай мураккаб ҳолатда бўлган боланинг вазияти туман “Инсон” ижтимоий хизматлар кўрсатиш маркази томонидан зудлик билан ўрганилиб, қизга вақтинча васий тайинлаш чораси кўрилди.
Ҳозирда вояга етмаган Ф.У. қариндошлари қарамоғига топширилди. Боланинг вазияти васийлик органи томонидан назорат қилинмоқда.
“Болалар омбудсмани ҳолат юзасидан ўз кузатувини давом эттиради”, – дейилади хабарда.
Изоҳ (0)