Moskvaning “SSKA” klubi va O‘zbekiston milliy jamoasi futbolchisi Abbosbek Fayzullayev “Monako” klubiga o‘tishi mumkinligi haqidagi mish-mishlarga munosabat bildirdi. Abbosbekning so‘zlariga ko‘ra, fransuz klubidan hech kim u bilan bog‘lanmagan.
— Bir necha hafta oldin OAVda “Monako” sizni o‘z safiga qo‘shib olishga jiddiy kirishgani haqida xabar tarqaldi. O‘zingizga u yerdan uy topdingizmi?
— Yo‘q. Bu xabar paydo bo‘lishi bilan Musayev va Diveyev men bilan hazil qilishni boshladi, ota-onam esa barcha qarindoshlarimiz tabriklashganini aytdi. Men hammani tinchlantirdim. O‘zim ham bu yangilikni internetdan bildim. “Monako”ning qiziqishi haqida menda hech qanday ma’lumot yo‘q, dedi Fayzullayev Sport24 nashriga.
Ma’lumot uchun, Fayzullayev 2023-yilning avgust oyidan beri “SSKA” safida to‘p suradi. Joriy mavsumda u klub uchun barcha musobaqalarda 23 ta o‘yinda maydonga tushib, 3 ta gol urdi va 6 ta assist amalga oshirdi. O‘zbekiston milliy jamoasi futbolchisining rossiyalik klub bilan amaldagi shartnomasi 2026-yil yozigacha tuzilgan.
Transfermarkt internet portalida keltirilgan ma’lumotga ko‘ra, futbolchining bozor qiymati 8 million yevroni tashkil qiladi. U bu borada O‘zbekistonda ikkinchi o‘rinda turadi.
Ma’lumot uchun, Abbosbek Fayzullayev 2024-yilda O‘zbekistonning eng yaxshi futbolchisi deb topildi.
Izoh (0)