Тошкент вилояти ҳокими Зоир Мирзаев фуқаролар учун бўлиб ўтаётган навбатдаги қабулида фуқароларга мурожаат қилиб, ҳамма ўз ҳудуди бўйича масъулларга, хусусан ҳокимларга мурожаат қилиши кераклигини, агар муаммоси ҳудуд ҳокимлари орқали ҳал бўлмаса кейин унинг қабулида бўлишлари кераклигини айтди.
Мана Олмалиқ ва Оҳангарон шаҳри, Оҳангарон тумани ҳокими ҳам бор, аввал уларга мурожаат қилинг, ҳал бўлмаса менга келинг, — дейди Зоир Мирзаев унинг қабулида навбатда турган мурожаатчиларга.
«Дарё» журналисти вилоят ҳокимининг фуқароларга мазкур мурожаатидан сўнг Ангрен шаҳар ҳокими Алишер Райимов билан суҳбатлашиб, мурожаатчилар нега уларнинг олдига бормай, тўғридан-тўғри вилоят ҳокими қабулига ошиқаётгани билан қизиқди.
Журналист Ангрен шаҳар ҳокими Алишер Райимовга юзланиб, «Ҳақиқатан ҳам мурожаатчиларга нега тўғри вилоят ҳокими қабулига ошиқмоқда? Улар сизларга ишонмаганидан шундай қиляптими? Ёки бу фуқаролар муаммоси вилоят даражасида ҳал этилиши керакми?», — дея савол берди.
Ангрен шаҳри ҳокими бунга жавобан «Фуқаролар бизнинг олдимизга ҳам келиб муаммоларни айтяпти. Муаммоларни ҳал қиляпмиз. Аммо барибир вилоят ҳокими олдига ҳам боришга қарор қилишади. Битта мисол келтираман, сизга, ҳозир менинг қабулимда бўлган фуқаро Дурдона Холжигитова таълим кредити олмоқчилигини айтиб, мурожаат қилди. Мен унга ёши 40 дан ўтгани боис, таълим кредити эмас, жамғармалар ҳисобидан контрактига ёрдам беришимни, шунингдек, ҳозирги ишлаётган жойида ойлик маоши кам бўлса, Ангрен шаҳридаги маҳаллаларнинг бирида хотин-қизлар фаоли сифатида ишлашга таклиф қилдим. Шу гапни гаплашиб турган пайтимизда қабулдагилар унинг исм-шаърифини ўқиб қолишди. Шунга у вилоят ҳокими қабулига борди», — дейди Ангрен шаҳри ҳокими.
Журналист мурожаатчи Дурдона Холжигитова билан ҳам суҳбатлашиб, Ангрен шаҳри ҳокими қабулидан сўнг, яна вилоят ҳокими қабулига киришининг боисини сўради.Тўғри, аввал шаҳар ҳокими қабулига кирдим. Шаҳар ҳокими муаммомни ҳал қилишини айтиб, ваъда берди. Шу пайт буёқдан исм-шарифим ўқилди. Шунга вилоят ҳокими қабулида ҳам бўлиб, шаҳар ҳокими муаммомни ҳал қилишини айтганини билдириб, вилоят раҳбарига миннатдорлик изҳор қилиб, қабулдан тезда чиқдим, — дейди Дурдона Холжигитова.
«Дарё» журналистининг бу ҳақдаги саволига жавоб берган Оҳангарон тумани ҳокими Абдурасул Абдуллаев туман ҳокимидан ўтиб, вилоят ҳокими қабулига ошиқаётган мурожаатчилар асосан ноқонуний талаб қўйишини, уларни туман ҳокими сифатида ўн мароталаб эшитганини айтмоқда.
Шундай мурожаатлар борки, мурожаатчи менга биринчи маротаба келган пайтда, ўн дақиқада ҳал бўлади. Бу мурожаат қонуний бўлиб, уни қонунан ҳал қилиш имконияти бизда бор. Иккинчи тоифадаги мурожаатлар шундай муаммоки, уларнинг ечими маблағга бориб тақалади. Бу маблағга туман бюджетининг қурби етмайди. Шу тоифадаги мурожаатчилар вилоятдан кўпроқ пул олиш мақсадида вилоят ҳокими қабулига келяпти. Яна шундай мурожаатчилар борки, уларнинг муаммосини нафақат туман, балки вилоят ҳам ҳал қилолмайди. Боиси, унинг талаби ноқонуний.Масалан, менга уй беринг деб келади. Қонуний томондан олиб қаралса, унга у бериш нотўғри, Низом талабига тўғри келмайди. Шу тоифадаги фуқаролар вилоят ҳокими, шунингдек, республика даражасидаги ташкилотларга бориб, мана туман ҳокими мурожаатимни ҳал этмаяпти дейди. Энди хулоса ўзингизга», — дейди ҳоким.
Изоҳ (0)