Тошкент шаҳар ҳокимининг жамоат ва диний ташкилотлар билан алоқалар бўйича ўринбосари Алимардон Қаршиев лавозимидан озод этилди. Халқ депутатлари Тошкент шаҳар кенгаши бу борада тегишли қарор қабул қилган.
Алимардон Қаршиев ушбу лавозимда 2019 йилдан буён ишлаб келаётган эди. Ўшанда у шаҳар ҳокимлигининг ташкилий-кадрлар хизмати раҳбари лавозимига ўтказилган Шуҳрат Турдиқулов билан ўрин алмашганди.
Шу билан бирга, кенгаш қарори билан Тошкент шаҳар ҳокимининг жамоат ва диний ташкилотлар билан алоқалар бўйича ўринбосари лавозимига Абдулвосид Ҳомитжонов тайинланган.
2018 йилдан бери Тошкент шаҳар ҳокими лавозимида ишлаб келган Жаҳонгир Ортиқхўжаев жорий йил 16 январь куни Шавкат Мирзиёев ўтказган энергия ресурслари таъминотига доир йиғилишда ишдан олинганди. 23 март куни эса “Ўзавтосаноат” компанияси раиси лавозимида ишлаб келаётган Шавкат Умурзоқов Тошкент шаҳри ҳокими вазифасини бажарувчи этиб тайинланди.
Пойтахт ҳокими вазифасини вақтинча бажариб келган Бахтиёр Раҳмонов Тошкент шаҳар ҳокимининг қурилиш, коммуникацияларни ривожлантириш, экология ва кўкаламзорлаштириш масалалари бўйича биринчи ўринбосари лавозимига қайтган эди.
Изоҳ (0)