Тошкент шаҳри ҳокими Шавкат Умурзоқов 2023 йилнинг 23 ноябрь куни “Оталар чойхонаси”, “Уч авлод учрашуви” ва “Бувижонлар мактаби” каби ойлик тадбирларни ўтказиш ва “бир пиёла чой” ташкил қилиш учун бюджетдан 10 млрд сўм маблағ ажратди. Бу ҳақда ҳоким қарори қабул қилинган.
Ҳокимликнинг маълумот беришича, ушбу қарор “Кекса авлод вакилларини ҳар томонлама қўллаб-қувватлаш ҳамда уларнинг ижтимоий фаоллигини оширишга доир қўшимча чора-тадбирлар тўғрисида”ги президент қарори, Халқ депутатлари Тошкент шаҳар Кенгашининг қарори ва Вазирлар Маҳкамаси топшириғи ижросини таъминлаш мақсадида қабул қилинган.
Халқ депутатлари Тошкент шаҳар Кенгашининг “Тошкент шаҳар маҳаллий бюджетининг 2022 йилдаги қўшимча манбаларини харажатларга йўналтириш ҳақида” 2022 йил 22 апрелдаги қарори билан “Нуроний” жамғармаси Тошкент шаҳар бўлими томонидан ҳар ойда “Оталар чойхонаси”, “Уч авлод учрашуви”, “Бувижонлар мактаби” ва бошқа шу каби учрашувларни ташкиллаштириш, шунингдек, “бир пиёла чой устида суҳбатлашиш”, тақдирлаш ва бошқа тадбирларни ўтказиш учун 10 миллиард сўм маблағ ажратилганлиги инобатга олинсин, — дейилади пойтахт ҳокими имзо чеккан қарорда.
Унда шунингдек, шаҳар ҳокимлигига мазкур тадбирларни ташкиллаштириш ва тақдирлаш мақсадида қўшимча равишда Тошкент шаҳар маҳаллий бюджетининг шу йилги иккинчи чорак даромадлари режасини ошириб бажарилган қисмидан 500 миллион сўм маблағ тақсимланиши белгиланган.
Шаҳар ҳокими қарори билан Тошкент шаҳар ҳокимининг биринчи ўринбосарига тақсимланган маблағни ижроси бўйича Халқ депутатлари Тошкент шаҳар Кенгашига ҳисобот тарзида киритиш ҳамда ажратилган маблағларни “Нуроний” жамғармасининг Тошкент шаҳар бўлимига ўтказиб берилишини таъминлаш вазифаси юклатилган.
Изоҳ (0)