Ўзбекистоннинг қатор вилоятларида 11 январдан дарслар бошланади

Ўзбекистоннинг қатор вилоятларидаги мактабларда 3-чорак дарслари 11 январдан бошланади. «Дарё» ўқиш бошланадиган ҳудудлар рўйхатини тақдим этади.

Дастлаб 10 январь куни соат 20:15 да Мактабгача ва мактаб таълими вазирлиги томонидан расмий маълумот эълон қилинди. Унда таъкидланишича, қишки таътил даврини узайтириш ваколати ҳудуддаги об-ҳаво шароитини инобатга олган ҳолда маҳаллий ҳокимликларга берилган.

Шундан сўнг 21:32 да боғчалардаги таътил назорати ҳам маҳаллий ҳокимликлар зиммасига юклатилди. Бунда ҳоким мактабгача таълим ташкилотининг иситиш тизими ҳамда бошқа шароитларни инобатга олиши кераклиги белгиланган.

Хоразм вилояти халқ таълими бошқармаси томонидан 12:10 да эълон қилинган хабарда 11—18 январь кунлари ҳудудда ҳаво ҳарорати кескин тушиб кетмаслигини айтилган. Шуни инобатга олиб, 2023 йилнинг 11 январь санасидан барча умумий ўрта таълим мактабларида ўқиш жараёни бошланишини маълум қилинган.

Соат 12:34 да эълон қилинган хабарга кўра, Андижон вилоятидаги таълим муассасаларида ҳам 11 январдан расман ўқув жараёнлари бошланади. Шу билан бирга, таълим муассасаларининг келгуси фаолияти об-ҳаво шароитидан келиб чиққан ҳолда ташкил этилади.

Фарғона вилоятидаги мактабларда ўқиш 16 январдан бошланади. 11 январдан 12 та олий ўқув юртлари, 76 та техникумлар, коллежлар, касб-ҳунар мактабларида ўқишлар бошланиши белгиланган.

Вилоят ҳокимлиги томонидан соат 15:02 да эълон қилинган хабарга кўра, ҳудуддаги 975 та умумтаълим мактабларида, Президент, ижод ва ихтисослаштирилган мактабларда эса ўқиш 16 январь, душанба кунидан бошланишига қарор қилинди.

Навоий вилояти ҳокимлиги ҳудуддаги таълим муассасаларда таълим жараёни қачондан бошланиши бўйича расмий маълумот бермади. Аммо Навоий давлат педагогика институтида ўқув жараёнлари 11 январдан бошланиши ҳақида хабар берилди.

Аномал совуқ кунлари талабалардан эҳтиёткорлик билан, шошилмасдан, йўл ҳаракати қоидаларига амал қилиб ҳаракатланиш тавсия этилган. Ўқув хоналари ҳамда талабалар турар жойлари иссиқлик билан таъминланган ва барчаси шай ҳолатга келтирилган.

Бухоро вилоятидаги барча умумтаълим мактабларида 3-чорак дарслари 11 январдан бошланади. Бу ҳақда вилоят халқ таълими бошқармаси соат 17:04да эълон қилди.

Самарқанд вилояти ҳокимлиги ахборот хизмати томонидан соат 21:23 да эълон қилинган хабарга кўра, 11 январь кунидан 950 та умумтаълим, 71 та ўрта-махсус таълим ва 13 та олий таълим муассасаларида анъанавий шаклда дарслар бошланади.

Шунингдек, ҳаво ҳарорати кескин совиган вақтда транспортда бориш қийинлиги, масофа узоқлиги ва зарур иссиқлик билан таъминлаш имконияти чекланганлиги сабабли 97 та умумтаълим ва 2 та ўрта-махсус таълим муассасаларида 13 январдан ҳамда 208 та умумтаълим муассасаларида 18 январдан ўқув жараёни бошланади.

Сурхондарё ҳокимлиги соат 21:41 да расмий маълумот чиқарди. Унда айтилишича, вилоятидаги барча умумтаълим мактабларида яъни 11 январь кунидан анъанавий шаклда дарслар бошланади.

Термиз шаҳар ва туманлар ҳокимликлари, ҳудудий штаблар томонидан Халқ таълими бошқармаси ҳамда таълим муассасалари билан ҳамкорликда мактабларнинг иситиш тизимини барқарор ишлашини таъминлаш бўйича зарур чоралар кўрилади.

Орадан бироз вақт ўтгач Қорақалпоғистондаги мактабларда ўқув жараёни 12 январдан бошланиши маълум қилинди. 12—18 январь кунлари барча умумтаълим мактабларида турли учрашувлар, ўқувчилар учун қўшимча тўгараклар, спорт мусобақалари ва бошқа йиғилишлар ўтказиш режалаштирилган.

Тошкент шаҳри ҳокимлиги соат 22:47 да тезкор муносабат билдирди. Унда пойтахт мактабларидаги дарслар 11 январдан бошлаб ишлашга тайёрлигига қараб, босқичма-босқич бошланиши айтилган.

«Бу борадаги қарор мактаблар раҳбарияти томонидан ота-оналар кенгаши билан келишган ҳолда қабул қилиниши тавсия этилади. Ҳокимлик томонидан коммунал хизмат тизимлари масъуллари билан биргаликда бу соҳада юзага келган муаммоларни тезкорлик билан ҳал этиш чоралари кўрилади», — дейилади хабарда.

Жиззах вилояти халқ таълими бошқармаси 11 январь кунидан жами 140 та мактабларда дарс машғулотларини ташкил этиш имконияти мавжудлиги аниқланиб, фаолиятини йўлга қўйиш режалаштирилганини маълум қилди.

Қашқадарё вилоятида 11 январдан бошлаб, ҳудуддаги об-ҳаво шароити ва таълим муассасалари ҳамда ОТМ ётоқхоналаридаги шарт-шароитлардан келиб чиқиб, босқичма-босқич таълим жараёнлари бошланади.

Шунингдек, тоғли ва узоқ қишлоқлар мактабларида, совуқ кунларда транспортда бориш қийинлиги ва масофа узоқлиги мавжуд бўлган мактабларда таълим жараёнлари 16 январдан бошланади. Халқ таълими бошқармаси тасарруфидаги имконияти чекланган махсус мактаб-интернатларида ўқиш 18 январдан бошланади.

Ҳозирга қадар Тошкент ва Сирдарё вилояти ҳокимликлари қишки таътил қачон тугаши ҳақида расмий маълумот бермади.