Бахтиёр Раҳмонов яна Тошкент ҳокими ўринбосарлигига қайтди
Бахтиёр Раҳмонов Тошкент шаҳар ҳокимининг қурилиш, коммуникацияларни ривожлантириш, экология ва кўкаламзорлаштириш масалалари бўйича биринчи ўринбосари лавозимига қайтди. Пойтахт ҳокими вазифасини бажарувчи Шавкат Умурзоқов бу борадаги тегишли қарорни имзолади.
“Ушбу қарор халқ депутатлари Тошкент шаҳар Кенгашининг сессиясига тасдиқ учун киритилсин”, — дейилади қарор матнида.
2018 йилдан бери Тошкент шаҳар ҳокими лавозимида ишлаб келган Жаҳонгир Ортиқхўжаев жорий йил 16 январь куни Шавкат Мирзиёев ўтказган энергия ресурслари таъминотига доир йиғилишда ишдан олинганди.
Президент йиғилишда ҳоким аномал сувуқда энерготаъминотда кузатилган узилишларга сабабчи бўлгани, қиш мавсумига лозим даражада тайёргарлик кўрмагани учун лавозимидан озод этилганини айтган. 16 январдан бошлаб, Жаҳонгир Ортиқхўжаев ўрнига Тошкент шаҳар ҳокимининг биринчи ўринбосари Бахтиёр Раҳмонов Тошкент шаҳар ҳокими вазифасини бажарувчи этиб тайинланган.
23 март куни эса “Ўзавтосаноат” компанияси раиси лавозимида ишлаб келаётган Шавкат Умурзоқов Тошкент шаҳри ҳокими вазифасини бажарувчи этиб тайинланди.
