Рейтинг: Энг кўп мигрантлар истиқомат қиладиган 10 та мамлакат

Америка — бу мигрантлар мамлакати. Мамлакат аҳолисининг фақатгина 2 фоизини туб америкалик ташкил этади. Шунга қарамай, кўплаб «янги америкаликлар» АҚШни ўзи учун ватан деб ҳисоблайди.

Рақамларга эътибор қаратилса, Америка бугунги кунда энг кўп мигрант қабул қилувчи мамлакатдир. Айни вақтда, фоизларда ҳисоб-китоб қилинса, мигрантларни қабул қилиш масаласида дунёнинг бир қатор мамлакатлари АҚШга рақиблик қила олади.

ForumDaily нашри БМТ тақдим этган маълумотларга таяниб, жаҳонда энг кўп мигрантлар истиқомат қиладиган мамлакатлар рўйхатини тайёрлади.

10. Люксембург

Ушбу митти мамлакат аҳолисининг 40 фоизини мигрантлар ташкил этади. Дунёдаги энг бой мамлакатлардан бири ҳисобланган Люксембург Бельгия, Франция ва Германия билан чегарадош.

9. Сингапур

Сингапур — жануби-шарқий Осиёда, Малайзия жанубида жойлашган шаҳар-мамлакат. Аҳолиси 5,3 миллион бўлган Сингапурнинг 43 фоизи мигрантлардан иборат.

8. Баҳрайн

Баҳрайн — Яқин Шарқдаги тез ривожланаётган мамлакат. Бу ерда 1,3 миллион одам истиқомат қилса, шунинг салкам ярмини мигрантлар ташкил этади.

7. Монако

Монако — яна бир кичик мамлакат. Унинг аҳолиси 40 мингга яқин. Аҳолининг 55 фоизи мигрантлардан иборат.

6. Макао

Хитойнинг жанубий қирғоғида, Гонконг яқинида жойлашган мазкур ҳудудда 600 минг киши яшайди, уларнинг 60 фоизи чет элликлардир. Мигрантларнинг асосий қисми маҳаллий казиноларда ишлайди.

5. Андорра

Андорра — Испания ва Франция оралиғида жойлашган. Аҳолиси 80 мингга яқин. Европанинг бошқа мамлакатларида бўлгани каби, Андоррада ҳам аҳоли сони мигрантлар ҳисобига ортади. Андорранинг 60 фоиз аҳолиси мигрантлардир.

4. Лихтенштейн

Лихтенштейнда 40 мингга яқин одам яшайди, шундан 62 фоизи бошқа мамлакат фуқаролари. Лихтенштейн Австрия ва Швейцария оралиғидаги тоғли чегарада жойлашган.

3. Кувайт

Кувайт ҳам худди Баҳрайн каби мигрантлар учун очиқ. Мамлакатнинг умумий аҳолиси 3,3 миллионга яқин. БМТ маълумотларига кўра, аҳолининг 74 фоизи муҳожирлардан иборат.

2. Қатар

Жаҳон ҳамжамияти Қатарни 2022 йилда бўлиб ўтадиган футбол бўйича Жаҳон чемпионати ишларига тайёргарлик кўриш жараёнида хорижий ишчи кучидан аёвсиз фойдаланиш ҳамда мамлакатдаги муҳожирларнинг меҳнат шароитларига чидаб бўлмаслигида айблаб келади. Шунга қарамай, мазкур мамлакатга мигрантлар оқиб келишда давом этмоқда. Қатар аҳолиси 2 миллиондан ортиқроқ бўлса, шунинг 75 фоизи мигрантлардир.

1. Бирлашган Араб Амирлиги

Бирлашган Араб Амирлиги — ушбу рейтинг етакчиси. Мамлакатда 9,5 миллион аҳоли истиқомат қилса, шундан 88 фоизи мигрантлардир. Уларнинг асосий қисми Ҳиндистон, Покистон ва Бангладешдан келган.