Россия президенти Владимир Путин Санкт-Петербургда МДҲ норасмий саммити очилишида Ҳамдўстлик мамлакатлари ҳамкорлигининг асосий йўналиши минтақада хавфсизлик ва барқарорликни сақлашдан иборат эканини айтди. У ушбу соҳада чақириқлар ва таҳдидлар ўсганини, шунингдек, МДҲда зиддиятлар юзага келганини тан олди.
«Ҳамдўстликка аъзо мамлакатлар орасида ҳам келишмовчиликлар пайдо бўлаётганини эътироф этишга тўғри келади, афсуски. Лекин асосийси шуки, биз ҳамкорликка қилишга тайёрмиз ва шундай қиламиз ҳам», — деди Россия президенти. Унинг таъкидлашича, Евросиё минтақасида хавфсизлик ва барқарорликка нисбатан таҳдидлар йилдан йилга ўсиб бормоқда, «биринчи навбатда ташқаридан».
Путин қайд этишича, муаммоли масалалар юзага келган тақдирда ҳам, МДҲга аъзо мамлакатлар «бир-бирига ўртоқларча ёрдам бериш ва воситачилик қилиш орқали, ўзлари, биргаликда ечишга интилмоқда».
Россия президенти айтишича, Ҳамдўстлик мамлакатлари терроризм ва экстремизм, трансчегаравий жиноятчилик, ноқонуний наркотиклар айланмаси ва коррупцияга қарши кураш соҳаларида шундай ҳамкорлик олиб бормоқда. Унинг қўшимча қилишича, ўтиб кетаётган йилда МДҲ мамлакатлари миллий хавфсизлик органлари ва махсус хизматлари ўртасида тезкор алоқалар сақланиб турибди.
Жорий йилда МДҲга аъзо мамлакатлар ўртасида бир қатор қуролли тўқнашувлар юз берди. Хусусан, 13 сентябрга ўтар кечаси Арманистон ва Озарбайжон чегарасида, 14 сентябрь куни эса Қирғизистон ва Тожикистон чегарасида жанговар тўқнашувлар қайта бошланди. Декабрь бошида Озарбайжон томони Арманистон ва Тоғли Қорабоғни боғлаб турувчи ягона йўл — Лочин йўлагини тўсиб қўйди, бу эса Арманистон ҳукуматининг ушбу минтақага жойлаштирилган Россия тинчликпарварларига нисбатан танқидига сабаб бўлди.
Санкт-Петербургдаги учрашувда Ҳамдўстликнинг еттита мамлакати — Озарбайжон, Беларусь, Қозоғистон, Қирғизистон, Тожикистон, Туркманистон ва Ўзбекистон президентлари Илҳом Алиев, Александр Лукашенко, Қосим-Жўмарт Тўқаев, Садир Жапаров, Эмомали Раҳмон, Сердар Бердимуҳамедов ва Шавкат Мирзиёев, шунингдек, Арманистон бош вазири Никол Пашинян иштирок этмоқда.
Изоҳ (0)