Сочида Россия, Арманистон ва Озарбайжон раҳбарлари Владимир Путин, Никол Пашинян ва Илҳом Алиев ўртасида музокаралар бўлиб ўтди. Бу ҳақда Кремль матбуот хизмати хабар бермоқда.
Саммит чоғида Путин дастлаб Пашинян билан, сўнг Алиев билан учрашди, ундан кейин эса уч томонлама музокаралар ўтказилди. Якунда томонлар қўшма баёнотлар қабул қилди.
Баёнотда айтилишича, Арманистон ва Озарбайжон куч ишлатишдан ва уни ишлатиш ҳақидаги таҳдидлардан тийилиш мажбуриятини олади, Россия эса ярашув битимини имзолашга тайёрланишда ёрдам беришни ваъда қилди.
Шунингдек, учала томон ҳам 2020 йил кузида Тоғли Қорабоғдаги жанглардан кейин тузилган келишувларга риоя қилиш тарафдори эканини тасдиқлади ҳамда барча масалаларни БМТ устави ва 1991 йилги Олмаота декларациясига мувофиқ муҳокама қилишга келишиб олди.
Олмаота декларацияси — МДҲ мақсадлари ва тамойиллари ҳақидаги, Беловеж битимлари натижаларини ва СССР мавжуд бўлишдан тўхтатганини тасдиқлаган декларация.
Изоҳ (0)