2019 йилнинг сентябрида ишдан бўшатилган Олмазор тумани ҳокимининг архитектура, капитал қурилиш ва коммуникацияларни ривожлантириш бўйича ўринбосари вазифасини бажарувчи сифатида яна ўз лавозимига тикланди, деб хабар беради «Gazeta.uz».
Олмазор тумани ҳокими ўринбосари Абдурасул Ваҳобов «Kun.uz» журналисти билан содир бўлган можародан сўнг, ўз хоҳишига кўра вазифасидан кетганди. Ҳоким ўринбосари жавоб видеомурожаатида журналист Раҳматилла Исроилов муқаддам ундан тамагирлик йўли билан ер талаб қилгани ва бунинг эвазига катта миқдорда пора таклиф қилгани ҳақидаги даъвони илгари сурганди.
Раҳматилла Исроилов амалдорнинг сўзларини туҳмат деб атаган. Нашр Абдурасул Ваҳобовга нисбатан Ўзбекистон Бош прокуратурасидан чора кўришни сўраб, ариза берган. Тошкент прокуратураси эса ҳолат юзасидан жиноят иши қўзғатишни рад этган. Шундан сўнг Бош прокуратура шаҳар прокуратураси қарорини бекор қилиб, ишни қайта кўриб чиқишга йўналтирган эди.
Журналистлар билан учрашувда Тошкент прокурори ўринбосари Алиакбар Пўлатов ҳоким ўринбосарининг сўзлари журналистга нисбатан туҳмат бўлган ёки бўлмагани тўғрисидаги саволга аниқ жавоб бера олмаган. У прокуратура текширувлар якунида ишдан бўшатиш — 20 йил ҳокимликда ишлаган ходим учун етарлича қаттиқ жазо эканлиги тўғрисидаги хулосага келинганини билдирган.
«Xabar.uz» нашри 2 ноябрь куни Олмазор туман ҳокимлигининг ҳоким ўринбосари вазифасини бажарувчи Абдурасул Ваҳобовнинг имзоси қўйилган хат нусхасини эълон қилди. Хат 2020 йил 1 июль санасига тегишли. Шу билан бирга, Тошкент ҳокимлиги сайтида туман ҳокимнинг ўринбосари лавозими ҳамон бўшлигича қолмоқда.
«Узоқ вақт давомида ҳоким ўринбосари лавозимида ишлашга ҳеч ким келмади… Ислом цивилизацияси марказининг қурилиши сабаб кўплаб бузилишлар ва қурилиш ишлари бўлди. Халқнинг Президент порталига мурожаатлари кўпайди. Ҳал этилиши лозим бўлган саволлар ортгани сабаб Абдурасул Ваҳобов вақтинча ишга қайта олинди. Эътибор берган бўлсангиз, у ҳоким ўринбосари вазифасини бажарувчи ҳисобланади. Ҳали ҳоким ўринбосари сифатида тайинлаш бўйича қарор қабул қилинмаган», — дейди ҳокимлик вакили «Gazeta.uz»га.
Олмазор ҳокимлиги матбуот хизматининг тушунтиришича, агарда аҳолининг портал орқали юборган мурожаатларига белгиланган вақтда жавоб қайтарилмаса, бу қонун бузилиши ҳисобланади ва шу сабабли ҳокимликлар жавобгарликка тортилиши мумкин.
Аввалроқ Ислом цивилизацияси маркази қурилиши сабаб Олмазор туманидаги 237 та хонадон бузилгани тўғрсида хабар берилганди. Қурилаётган марказ ҳудудида истиқомат қилган маҳаллий аҳоли Яшнобод туманидаги Махтумқули кўчасида жойлашган «Яшил боғ» турар жой мажмуасидаги янги қуриб фойдаланишга топширилган кўп қаватли уйларга кўчиб ўтмоқда.
Изоҳ (0)