Қашқадарё вилоятининг Деҳқонобод туманидаги Жинғил қишлоғида жойлашган тиббиёт пункти қайта таъмирланадиган бўлди. Бу ҳақда «Дарё»га туман ҳокимлиги ахборот хизмати хабар берди.
Маълум қилинишича, туман ҳокимининг Жинғил қишлоғидаги қабулида аҳоли ҳокимга мазкур тиббиёт маскани ҳақида хабар бериб, унинг таъмирталаблигидан шикоят қилган.
«Ҳоким аҳоли айтган тиббиёт масканида бўлиб, унинг аҳволи билан танишди ва эртагаёқ яроқсиз бинони бузиб, тиббиёт маскани учун янги бино қуриб берилишини маълум қилди», — дейди «Яшнобод» МФЙ раиси Зокир Алимардонов.
Ҳокимлик ахборот хизматининг маълумот беришича, Зоир Алиқуловнинг «Яшнобод» МФЙ Жинғил қишлоғидаги қабулида аҳолини қийнаб келаётган энг асосий муаммоларнинг учтасига ечим топилган.
«Ҳоким қабулида бўлган фуқаролар ҳудуддаги тиббиёт марказини қайта таъмирлаш, йўл таъмири ва ичимлик суви масаласида мурожаат қилди. Топшириққа кўра, қабулдан сўнг аҳоли фойдаланувидаги уч километр йўлга шағал ётқизила бошланди. Ичимлик суви учун қувур тортиш ҳаракати ва тиббиёт масканининг яроқсиз биносини бузиш ва янгисини қуриш ишлари бошлаб юборилди», — дейди ҳокимлик ахборот хизмати ходими.
Қўшимча қилинишича, ҳашар йўли билан қишлоқ аҳолиси фойдаланиб келаётган уч километр йўлга шағал тўкилиб, текислаш ишлари олиб борилган.
Изоҳ (0)