Тошкент шаҳрининг Яшнобод туманидаги “Янги давр” маҳалласининг Фарғона йўлидаги 3-тор кўчада яшовчи аҳоли кўчанинг автомобиллар учун асосий қатнов йўлига айланганидан безовталигини айтса, шу маҳаллада тадбиркорлик қилаётган фуқаролар ишлаб чиқарган маҳсулотларини экспорт қилиш учун юк автомобиллари орқали маҳалладан олиб чиқишда муаммоларга дуч келаётганини билдирди. “Дарё” журналисти мазкур мурожаатни ўрганиш мақсадида ушбу маҳаллада бўлди.
Кўчамиздан 24 соат машина ўтиб-қайтади. Лекин бу кўчани ёпиш ҳақида ҳоким қарори ҳам бор. Шунга қарамасдан ҳеч ким кўчага киришни тақиқловчи белгига эътибор бермайди. Болаларимиз кўчага чиқолмайди, йўлда пиёдалар йўлакчаси йўқ. Жудаям тор бўлганлиги сабабли машиналар келиб қолганда ўзини эҳтиёт қилиш учун тўхтаб туриш керак бўлади. Яъни кўчамиз бир вақтнинг ўзида ҳам автомобиллар ҳаракати, ҳам пиёдалар юришига жавоб бермайди. Шу боис кўчамиз умуман ёпилиб, машиналар қатнови тўхташини истаймиз, — дейди аҳоли вакиллари.
3-тор кўчада яшовчи аҳолининг билдиришича, улар шахсий машиналарини кўчада қолдиришга ҳам қўрқади. Сабаби шу йўлдан ҳаракатланувчи автомобиллар томонидан зарар етказилади.
Кўчада ўзимизнинг машинамизни қолдиролмаймиз — туртиб, пачоқ қилиб кетишади. Болаларимиз неча маротаба жароҳатланди, оёғи синганлари бор. Уйимиз дарвозасидан кўчага чиқишнинг имкони йўқ. Кўчамиздан канализация тармоғи ўтган. Юк автомобиллари юрса, зарар етади ва яна харажат. Ўзимизнинг кучимиз билан кўчамиз бошига арк қурдик. Ҳокимият бузиб, яна йўл очиб берди. Қайта қилиб берамиз дейишганди, қилиб беришмади. Яна ўзимиз ёнимиздан харажат қилиб, йўлнинг ҳар икки томонини ҳам ёпиб қўйдик. Шунга қарамасдан кўчамиздан ўтиб-қайтувчи машиналар кўп. Ҳаракат тўхтамаяпти, — дейди шу кўчада яшовчи Эркин Абдураҳмонов.
Аҳолининг айтишича, кўчада автомобиллар ҳаракати 24 соат давом этгани боис одамларнинг кечки пайт дам олишига ҳам халал беради.
Кечаси ухлаб ҳам бўлмаяпти. Ҳар қандай инсон шуни ўзида ҳис қилиб кўрса, бу ердагиларга қанчалик қийин эканини тушуниб етарди, — дейди у.
Одамларнинг қўшимча қилишича, енгил ва юк автомобиллари ҳаракати учун мўлжалланган асосий кўча бор. Бироқ у аҳолига номаълум сабабларга кўра ёпилган.
Аҳоли вакилларидан Раъно Абдуллаеванинг айтишича, ҳоким тўрт кунга очиқ туради дейилиб, бузиб ташланган арк олти ой давомида очиқ қолган.
Кўчамиздан ўтувчи юк автомобиллари газ трубаларини уриб, синдириб кетишди. Токларни узиб кетишди, асфалтни ёриб ташлашмоқда. Кўчамизнинг ҳар икки бошида, кириш жойларида ушбу кўчага юк машиналарининг киришини тақиқловчи белгилар бор. Лекин ҳеч ким эътибор бермайди. “Нега бунақа қиляпсизлар десак, белгини сотиб олиб, ўзларинг қўйиб олгансизлар”, деб, бизни ҳақорат ҳам қилишмоқда. Ҳеч ким бизни ўйламаяпти, тинчлик йўқ — чанг, ахлатхонада яшаяпмиз, — дейди Раъно опа.
Аҳолининг қўшимча қилишича, туман ҳокими уларга берган ваъдасини бажармаган.
Шу маҳаллада фаолият юритувчи тадбиркорлик субъекти вакилларининг “Дарё”га билдиришича, улар ишлаб чиқарган маҳсулотларини хорижга экспорт қилиш учун юкларни маҳалладан олиб чиқишда муаммоларга дуч келмоқда.
Бугунги кунда шунақа ҳолат бор — юк автомобилларимиз бу кўчадан кириб-чиқишда муаммога учрамоқда. Маҳсулот олиб келиш ва олиб кетишда можарога дуч келяпмиз. 2023 йилнинг 16 август куни туман ҳокими билан учрашиб, йўл очиб бериш ваъдасини олгандик. 2023 йилнинг 3 сентябрь куни бизга йўл очиб берилиши лозим эди. Бироқ бугунги кунга келиб ҳам йўл очилмаган. Биз шу кўчада яшовчи аҳолини ҳам яхши тушуниб турибмиз. Шу сабаб ҳам туман ҳокими билан гаплашиб, бизга, ишлаб чиқарувчи корхонага алоҳида йўл очиб берилишини сўраган эдик. Лекин муаммо ҳамон ҳал этилмаяпти, — дейди “Арҳат инкс” ишлаб чиқариш корхонаси масъули Одил Рўзметов.
Корхона вакилининг билдиришича, туман ҳокими муаммони ечиш учун бошқа бир корхонага тегишли ердан йўл очиб берилишини, аммо йўл очиш харажатлари корхона зиммасига юклатилишини айтиб, қурувчи тавсия қилган. Ҳоким тавсиясига кўра, корхона томонидан қурувчи билан 500 миллион сўмлик шартнома тузилиб, 410 миллион сўми тўлаб берилган.
Ҳоким томонидан ваъда берилгач, барча муаммолар — ўша корхона вакиллари билан гаплашиб, аҳоли билан маслаҳатлашиб, бизга йўл очиб берилиши керак эди. Биз шу йўлга муҳтожмиз. Маҳсулотларимизни хорижга экспорт қилишимиз керак. Ҳокимни ўша 16 августда кўрганимиз, шундан бери ҳоким билан учраша олмаяпмиз, — дейди вакил.
Яшнобод тумани ҳокимлиги ахборот хизмати аҳолининг туман ҳокими ваъдабоз эканини айтган гаплари, шунингдек, “Дарё”нинг тадбиркорни қийнаётган йўл масаласидаги барча саволларини очиқ қолдирди. Шунчаки “Ҳокимлик пул олмаган экан”, деган икки оғиз гап билан чекланишни лозим топди.
Изоҳ (0)