«Дарё» республикада фаолият юритувчи ҳокимларнинг хизмат автомобиллари русумини ўрганишда давом этади. Бу сафар Тошкент шаҳар ва туман ҳокимларининг хизмат машиналари ҳақидаги маълумотлар бир саҳифага жамланди.
Ортиқхўжаев қандай машинадан фойдаланади?
Пойтахт ҳокимлиги матбуот хизматининг маълум қилишича, Тошкент шаҳар ҳокими Жаҳонгир Ортиқхўжаевнинг хизмат машинаси Mercedes-Benz автомобилининг 222 модели бўлиб, ранги қора.
Мавзуга доир: «Gazeta.uz»: Тошкент ҳокимлигига совға қилинган қимматбаҳо Mercedes Жаҳонгир Ортиқхўжаевнинг ўзига тегишли
2018 йилдан буён Мирзо Улуғбек туманига раҳбарлик қилаётган Шавкатбек Иргашев, уч йилдирки, Учтепа туманини бошқараётган Фарҳод Абдуллаев иш вақтида оқ Gentra автомобилидан фойдаланади.
2019 йилда тадбиркорликдан давлат бошқаруви соҳасига кириб келган Яккасарой тумани ҳокими Анвар Сайфутдиновнинг ҳам хизмат машинаси Gentra.
Беш ҳокимнинг ҳамроҳи Malibu
2021 йилнинг июнида Чилонзор тумани ҳокими курсисини эгаллаган Шавкат Мавлонов, Янгиҳаёт туманига икки йилдан бери ҳокимлик қилаётган Ҳаёт Иноғомов, Олмазор тумани ҳокими Азизхон Умархонов ҳамда Яшнобод тумани ҳокими Бахтиёр Раҳмонқуловларнинг иш пайтидаги ҳамроҳи Malibu-2 автомобили бўлиб, барчасининг ранги қора.
2005–2011 йилларда Тошкент шаҳри ҳокими, 2018–2019 йилларда Қурилиш вазири лавозимида ишлаб, 2019 йилда Шайхонтоҳур туманига ҳоким этиб тайинланган Абдуқаҳҳор Тўхтаевнинг хизмат машинаси эса Malibu-1.
Икки ҳоким Captiva’дан фойдаланади
Миробод тумани ҳокими Шуҳрат Пўлатов ҳамда 2020 йилнинг август ойидан бери Сергели туманини бошқариб келаётган Элбек Шукуров Captiva’дан фойдаланади.
Tracker’дан ҳам икки ҳоким фойдаланади
2021 йилнинг июнь ойида Бектемир тумани ҳокими лавозимига тайинланган Тапил Маҳамадзияев ва 2022 йилнинг январь ойидан буён Юнусобод туманини бошқараётган Баҳодир Абдувалиевларнинг хизмат машинаси қора Tracker автомобилидир.
«Дарё» ҳокимларнинг хизмат автомобиллари русуми қандайлигини ўрганишда давом этади.
Миролим Исажонов тайёрлади
Изоҳ (0)