Тошкентдаги иккинчи гастрономик кўчани ташкил этиш бўйича ишлар бошланиш арафасида, деб хабар беради Миробод тумани ҳокимлиги матбуот хизмати.
Қайд этилишича, 15 июлдан Миробод тумани Тарас Шевченко кўчасини гастрономик кўчага айлантириш бўйича кенг кўламли бунёдкорлик ишлари бошланади. Шу муносабат билан 13 июль куни туман ҳокими Анвар Сайфутдинов ушбу кўчада фаолият юритувчи тадбиркорлик субъектлари билан очиқ мулоқот ўтказган.
Ҳоким учрашув аввалида Вазирлар Маҳкамасининг қарорига асосан пойтахт кўчаларида жозибадор ва серқатнов туризм ҳамда хизмат кўрсатиш инфратузилмасини яратиш мақсадида 24/7 режимда ишловчи кўнгилочар кўча ташкил этиш белгилангани ҳақида гапирди.
Мазкур туристик кўчанинг ишга туширилиши тадбиркорларнинг даромад манбаининг ошишига хизмат қилиши таъкидланган. Тадбиркорлар туристик кўча лойиҳаси билан танишиб, ўзларини қизиқтирган барча саволларга жавоб олган.
15 июлдан бошланадиган ишлар давомида Тарас Шевченко кўчасида ёритиш устунларини ўрнатиш, ўриндиқлар ва чиқинди урналарини ўрнатиш, дарахт кўчатлари ўтқазиш, суғориш тизимларини ўрнатиш, аудио мусиқа тизимини ташкил этиш, декоратив арка ва устунлар ўрнатиш, фотозоналар учун декоратив элементлар ташкил этиш, пиёдалар йўлаклари, велойўлаклар ва замонавий ўриндиқлар ташкил этиш, болалар ўйингоҳи ва кўргазмали саҳна ўрнатиш каби ишларни амалга ошириш режалаштирилган, дейилади хабарда.
Тошкент шаҳар ҳокимлиги март ойида Яшнобод туманида биринчи гастрономик кўчани ташкил этиш борасидаги режалари билан бўлишганди. Ўшанда пойтахтнинг саккизта тумани ҳудудида ҳунармандлар ва гастротуризм учун зоналар яратилиши айтилган эди.
Изоҳ (0)