Пойтахтдаги фойдаланилган буюмлар сотиладиган “Янгиобод” бозори ҳақида эшитганмисиз? Кейинги пайтларда бу бозорга сайёҳларнинг ҳам ташриф буюриши анча ортган. Боиси, у ерда сотиладиган ноёб буюмлар хорижликларда ҳам катта қизиқиш уйғотмоқда.
Бозорда йўқ нарсанинг ўзи йўқ. Бу ерда истаган нарсангизни топишингиз ва керак бўлмай қолган ҳар қандай буюмингизни сотишингиз мумкин. Замонавий онлайн бозорларнинг анъанавий кўриниши деса ҳам бўлади.
Бозор ҳақиқатан ҳам ранг-баранг, яъни у ердан озиқ-овқат маҳсулотларини, янги кийим-кечакларни, шу билан бирга эскиларини ҳам, аллақачон ишлаб чиқариш тўхтатилган техникаларнинг асбоб ускуналарини, уй ҳайвонлари, қушлар, аквариум балиқлари ва энг қизиғи кўп йиллик тарихга эга осори атиқаларни ҳам харид қилишингиз мумкин.
Дарвоқе, сизга бозорга келишнинг энг қулай транспорт воситаси ҳақида айтиб ўтмадик. “Янгиобод” бозорига шаҳарнинг исталган бурчагидан биргина метро орқали келишингиз мумкин. Мустақилликнинг 30 йиллиги муносабати билан қурилган ерусти метроси йўналишининг “Янгиобод” бекатида тушиб, ташқарига чиқишингиз билан бозор муҳити сизни қарши олади.
Янгиобод ҳам бошқа бозорлар сингари душанба куни ишламайди. Савдогарларнинг сўзларига кўра, бозор шанба ва якшанба кунлари “тўлиб-тошади”. Шундоқ ҳам арзон бўлган буюмларни, савдолашиб янада арзонроққа харид қилса бўлади.
Қулоққа чалинган ғалати гап-сўзларга қараганда, бу бозорда одамнинг жонидан бошқа барча нарсани топиш мумкин экан. Бу гап сўзлар қанчалик ҳақиқатга яқинлигини билмаймиз-у, аммо ростдан ҳам барча нарса бор экан, ишонаверинг.
Техника жиҳозлари: телефон ёки компьютер сотиб оламан десангиз, эҳтиёт бўлиш керак — бозорда ўғирланган маҳсулотлар ҳам йўқ эмас.
Бозорда кичик ҳайвонот олами ҳам бор — қушлардан тортиб турли зотдор итлар-у, рангли балиққача. Нархи эса бошқа бозор ва зоодўконларга қараганда ҳайратланарли даражада арзон!
-iYngeq7z.jpg)
Эски ёки бир марталик мавсумга чидаб берадиган кийим-кечак излаётган бўлсангиз ҳам “Янгиобод” бозори сизга ёрдам беради. Туфлиларни ҳолатига қараб 30 мингдан 50 минггача, ичкилар кийимини эса 20-60 минггача бўлган нархда харид қилишингиз мумкин.
Агар болалик йилларингиз билан боғлиқ хотираларни эслагингиз келса ҳам албатта бу бозорга ташриф буюринг. Бу ерда камида 5-6 та авлоднинг эрмаги бўлган ўйинчоқлар, оналаримизнинг сарпосига қўйилган биллур идишлар ҳам бор.
Аслида бундай бозорлар дунёнинг ҳар бир нуқтасида бор. Энг қизиғи, уларнинг ҳам ўз харидори бор.
Масалан, Париждаги Сент Уан эски бозорида — антиквар буюмлардан тортиб қизиқарли майда-чуйдаларгача бор. Дизайнерлик кийимлари ва буюмлар, қадимий мебеллар, китоблар, янги ва ишлатилган электроникаларни ҳам топиш мумкин.
2004 йилда Берлинда ҳам эски-туски бозори очилди — аввалига вақтинчалик ярмарка сифатида, кейинчалик эса мунтазам ишлайдиган бозорга айланди. Фақат асл қадимий буюмлар қидирсангиз, эҳтиёт бўлишингиз керак — ҳар доим замонавий буюмларни сунъий равишда қадимийлаштирилганини учратиш хавфи мавжуд.
Бундай бозорлар Мадридда, Лондонда, Барселонада ва Истанбулда ҳам бор. Аслида улар кўп жиҳатдан фойдали. Кераксиз буюмлар ахлатхоналарга ташланмайди ва уларнинг умри узаяди. Кейин бу ҳам тадбиркорлик. Биз арзимас ҳисоблаган буюмлар билан ҳам бир хонадоннинг қозони қайнайди.
Антиквар буюмлар сотиладиган бозор! Эҳ, мана буни ҳақиқий музей деса бўлади. Ишонаверинг, бу ерга келсангиз аниқ ўзингизни бошқа ҳудудга тушиб қолгандек ҳис қиласиз. Хўш, буюм антиквар ҳисобланиши учун камида неча йиллик тарихга эга бўлиши керак? Улар ҳақиқатан ҳам қимматми? Бу каби саволларимизга тадбиркор Улуғбек Маҳмуджонов жавоб беради.
— Аслида 100 йил сақланган буюмларни ҳам тарихий деса бўлади. Афсуски, кўп инсонлар ота-онасидан қолган эски буюмларни қадрламай, уларни ташлаб юборишади. Улардан воз кечиш эмас, қадрлаш керак. Улар мамлакат тарихи ҳақида сўзлайди.
Асосий харидорлар хорижликлар, аммо эски буюмларга қизиқадиган ҳамюртларимиз ҳам йўқ эмас, — дейди етти йилдан буён антиквар буюмлар савдоси билан шуғулланувчи тадбиркор Улуғбек Маҳмуджонов.
Янгиобод ранг-баранг ва бошқа зоодўконларга қараганда анча арзон ҳайвонот бозори билан ҳам машҳур. Бу ердан ранг-баранг қушларни 15 минг сўмдан бошлаб харид қилишингиз мумкин. Гапирадиган, шеър ёдлаб берадиган қушларнинг баҳоси эса анча қиммат. “Янгиобод”нинг кўримсизгина аквариум бозорида ҳам савдо авжида. Бор-йўғи 5 мингдан бошлаб, ранг-баранг ва кўзни қувнатувчи балиқларни харид қилишингиз мумкин.
Хуллас, “Янгиобод” бозорига бўлган сафаримиз ҳам якунланди. Вақтингиз бўлганида шунчаки бу ерга келишингизни тавсия қиламиз. Самимий инсонлар, ноодатий буюмлар ва арзон нарх наво сизни ҳайратлантириши аниқ.
Агар бозор ҳақида янада кўпроқ маълумотга эга бўлишни истасангиз, ҳавола орқали махсус репортажни томоша қилинг. Умид қиламизки, кетган вақтингизга ачинмайсиз.
Изоҳ (0)