Россия президенти Владимир Путин “13 йиллик тинчликни ўғирлади”, бу бошқа ҳудудларга тарқалмасидан, унинг ҳаракатларига ҳозироқ якун ясаш керак. Бу ҳақда Украина президенти Владимир Зеленский 16 январь куни Швейцариянинг Давос шаҳрида бўлиб ўтган Жаҳон иқтисодий форумидаги чиқиши чоғида маълум қилди.
“Мен сизнинг ҳақиқатан ҳам муҳим саволларга жавоб эшитишга тайёрлигингизни жуда қадрлайман: уруш қачон тугайди? Учинчи жаҳон уруши бўлиши мумкинми? Путин билан музокара қилиш вақти келдими? Европада кенг кўламли уруш деярли икки йилдан бери давом этмоқда. Россиянинг Қримимизни ноқонуний аннексия қилиши бошланган вақтни ҳисобга олсак (уруш – таҳрир) деярли 10 йилдан бери давом этмоқда”, — деди Зеленский.
Сиёсатчи Россия 10 йилдан ортиқ вақтдан бери Судандан Малигача Африка ишларига ва Суриядаги урушга аралашиб келаётганини билдирди.
“Сурия уруши Путиннинг дунёга ниманидир исботлаш қарори туфайли ҳалигача қон тўкмоқда. Бу деярли 13 йилдан бери давом этмоқда. Дарҳақиқат, бир киши камида 13 йиллик тинчликни ўғирлади ва унинг ўрнини бутун дунёга таъсир қиладиган оғриқ ва инқирозлар билан алмаштирди”, — деди Украина президенти.
Зеленскийнинг сўзларига кўра, Путин уруш тимсоли бўлиб, турли урушлар ва тўқнашувлар давом этишининг ягона сабабчисидир.
“У ўзгармайди. Биз ўзгаришимиз керак. Ҳаммамиз шу даражада ўзгаришимиз керакки, бу одамнинг ёки бошқа тажовузкорнинг бошида турган жиннилик устун бўлмаслиги керак. Путин ҳар доим нима истаётгани, нима қилаётгани ва ким нишони экани ҳақида очиқ гапиради. Дунёдаги хаос ёқасида унинг жавоби террорчи кучларни чексиз қўллаб-қувватлашдир.
Унга ўхшаган режимларнинг мавжудлиги уруш олиб борилгунча давом этади. Биз, ҳаммамиз ўзимизни ҳимоя қила олар эканмиз, эркин дунёда мавжудмиз. Агар кимдир бу фақат биз ҳақимизда, бу фақат Украина ҳақида, деб ўйласа, у тубдан адашади”, — деди президент.
Шу билан бирга, у форум иштирокчиларига мурожаат қилар экан, бугунги кунда қайси давлат Кремль агрессиясини тўхтата олишда Украинанинг жанговар тайёр армиясига тенг келишини сўради.
“Мамлакатларингиз бошқа давлатни, бошқа миллатни ҳимоя қилиш учун қанча эркак ва аёлни юборишга тайёр? Агар биз яқин йилларда Путинга қарши биргаликда курашишимиз керак бўлса, унга ва унинг армиясига жасур эркакларимиз ва аёлларимиз буни аллақачон амалга ошираётган бир пайтда чек қўйиш яхши эмасми? Улар жаҳон чемпионларидир”, — деди Зеленский.
Изоҳ (0)