Россия президенти Владимир Путин мамлакат “душман” ҳаракатларига жавобан “Орешник”нинг жанговар синовларини давом эттиришини айтди.
Россия етакчисининг қайд этишича, Киев бир неча бор Москва ва Санкт Петербургдаги давлат аҳамиятига молик нишонларга ҳужум қилишга уринган. Путинга кўра, бунга жавобан Бош штаб ва Мудофаа вазирлиги Украина ҳудудидаги “Орешник” томонидан йўқ қилинадиган нишонлар рўйхатини тузмоқда.
Путиннинг сўзларига кўра, Россияда “Орешник”ка ўхшаш, фойдаланишга тайёр яна бир қанча комплекслар мавжуд.
Унинг қўшимча қилишича, “Орешник”нинг кучи ядро қуролидан фойдаланиш билан таққосланади.
Агар бу ракеталардан оммавий тарзда, яъни бир зарбада бир нечта “Орешник”лардан фойдаланилса, бу зарбанинг кучи ядро қуролидан фойдаланишга тенг бўлади, деди Путин.
- Ядро қувватига эга сўнгги гипертовушли “Орешник” баллистик ракетаси умумий қуввати 900 килотон бўлган зарядларни етказиб бера олади.
- “Орешник”нинг максимал йўқ қилиш масофаси 5,5 минг км, у 10 Мач (тахминан 12,4 минг км / соат) тезликда ҳаракатланади ва 1,5 тоннагача бўлган жанговар каллакни кўтара олади. Якуний босқичда, жанговар каллаклар максимал тезликка эришганда, ракетани ушлаб қолишнинг иложи бўлмайди.
Путин 21 ноябрь куни Украинадаги объектга баллистик ракета зарбаси берилганини тасдиқлаган эди.
Унинг сўзларига кўра, синовлар муваффақиятли ўтган, армия кўзланган мақсадга эришган: “Днепропетровскда Совет иттифоқи давридан бери энг йирик ва машҳур саноат мажмуаларидан бири бўлган, бугунги кунда ракета технологиялари ва бошқа қуроллар ишлаб чиқарадиган Южмаш заводи зарар кўрган”.
Шу пайтдан бошлаб, биз бир неча бор таъкидлаганимиздек, аввалроқ Ғарб томонидан қўзғатилган Украинадаги минтақавий можаро глобал миқёсда тус олди, деди Россия етакчиси.
Путин ўз баёнотида Россия ракеталардан фойдаланишдан олдин Украина фуқароларини хавфли зонани тарк этиш ҳақида огоҳлантиришини таъкидлади.
Россия тинч йўлни афзал кўради, бироқ воқеаларнинг ҳар қандай ривожига ҳам тайёр, жавоб доимо тайёр, дея қўшимча қилган у.
Изоҳ (0)