Украина армияси ҳали Курск вилоятини тарк этишни режалаштирмаяпти ва “керак бўлганда” у ерда қолишни режалаштирмоқда. Бу ҳақда AFP нашри Украина армиясидаги манбаларга таяниб хабар берди.
Ҳисоботда қайд этилишича, Украина Қуролли кучлари ҳужумларнинг энг юқори чўққисида Россиянинг халқаро миқёсда тан олинган 1400 квадрат километрдан сал камроқ қисмини назорат қилган. Ҳозирда Россиянинг қарийб 800 квадрат километр майдони украинлар назорати остида қолмоқда.
Шунингдек, украиналик манбалар AFP нашрига Россия армияси Донецк вилоятида Покровск ва Курахова томон олдинга силжишда давом этаётганини маълум қилган. Курахово яқинида Россия ҳар куни 200-300 метр майдонни эгаллашга муваффақ бўлмоқда.
Россия президенти Владимир Путиннинг Украинанинг Днепр шаҳрига зарба бериш учун Россиянинг янги “Орешник” ракетасидан фойдаланиш ҳақидаги сўзларини шарҳлар экан, AFP суҳбатдошлари Россия ҚК арсеналидаги бундай ракеталар сони “жуда чекланган”лигини айтган.
Путин 21 ноябрь куни Украинадаги объектга баллистик ракета зарбаси берилганини тасдиқлаган эди.
Унинг сўзларига кўра, синовлар муваффақиятли ўтган, армия кўзланган мақсадга эришган: “Днепропетровскда Совет иттифоқи давридан бери энг йирик ва машҳур саноат мажмуаларидан бири бўлган, бугунги кунда ракета технологиялари ва бошқа қуроллар ишлаб чиқарадиган Южмаш заводи зарар кўрган”.
“Шу пайтдан бошлаб, биз бир неча бор таъкидлаганимиздек, аввалроқ Ғарб томонидан қўзғатилган Украинадаги минтақавий можаро глобал миқёсда тус олди”, деди Россия етакчиси.
Путин ўз баёнотида Россия ракеталардан фойдаланишдан олдин Украина фуқароларини хавфли зонани тарк этиш ҳақида огоҳлантиришини таъкидлади.
“Россия тинч йўлни афзал кўради, бироқ воқеаларнинг ҳар қандай ривожига ҳам тайёр, жавоб доимо тайёр”, дея қўшимча қилган у.
БРБ: Россия Днепрга Кедр ракетаси билан зарба берди
Рус армияси Днепр шаҳрига Кедр ракетаси билан зарба берган бўлиши мумкин. Бу ҳақда Украина Мудофаа вазирлигининг Бош разведка бошқармаси (БРБ) маълум қилди.
Вазирлик матбуот хизматининг аниқлик киритишича, ракетанинг Астрахандан Днепрга уcиш вақти 15 дақиқани ташкил қилган. Ракетанинг тезлиги, Украина разведкаси маълумотларига кўра, тахминан 13500 км/соат бўлган.
Изоҳ (0)