Андижонда МИБ тадбиркорга кредит маблағини беришдан бош тортган банкдан 200 млн сўм ундириб берди

Андижон вилоятининг Пахтаобод туманида кредит маблағини беришдан бош тортган банк тадбиркорга 200 миллион сўм тўлади. Бу ҳақда МИБ ахборот хизмати “Дарё”га хабар берди.

Мажбурий ижро бюроси Пахтаобод туман бўлими ходимлари томонидан июль ойида тадбиркорга 3 млрд сўм кредит маблағини беришдан бош тортган банкнинг автомашинаси хатлаб қўйилган эди. 

Суднинг ижро ҳужжатига кўра, банк ҳисобидан “Жозиба савдо файз” МЧЖга 200 млн сўм ундирилиши кўрсатилган. Банкнинг ҳудудий филиали томонидан “Жозиба савдо файз” МЧЖ билан кредит шартномаси тузилган бўлиб, унга кўра тадбиркорга 3 млрд сўм кредит маблағи ажратилиши белгиланган. Бироқ юқори турувчи банк муассасаси тартиб-таомилларига мувофиқ, ушбу маблағлар тадбиркорга берилмаган. 

Бизнес режасини кредит маблағларидан амалга оширишни кўзлаган тадбиркор эса бу орада фойдани бой бериб, зарарга кирган. Шунга кўра, суд орқали ўзига етказилган зарарни ундириб берилишини сўраган.

Суд қарори ижросини таъминлаш мақсадида банк масъуллари огоҳлантирилиб, банк балансида бўлган Onix автомашинаси хатлаб қўйилди. Банк етказилган зарар пулларини тадбиркорга тўлаб бермаса, хатланган Onix сотилиб, зарар пуллари тадбиркорга ундириб бериладиган бўлди.

Мазкур суд қарори бўйича олиб борилган ижро ҳаракатлари давомида банкдан тадбиркорга 200 млн сўм зарар пуллари тўлиқ ундириб берилиши таъминланди.