Навоий вилояти, Андижон вилоятининг Шаҳрихон ҳамда Қашқадарё вилоятининг Деҳқонобод туманларида ҳайдовчилик гувоҳномасини олиб беришни ваъда қилган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Навоий вилоятида фуқаро Б.Н. фуқаро М.Ж.нинг ишончига кириб, унга гўёки вилоят ЙҲХБда ишловчи танишлари орқали 1 000 доллар эвазига “Б” тоифадаги ҳайдовчилик гувоҳномасини олиб беришини айтган. Сўнг 700 доллар ва 4 млн сўм олган вақтида ушланган.
Шунингдек, Шаҳрихон туманида “Ватанпарвар” ташкилотининг Андижон тумани клуби ўргатувчи устаси М.О. ва “М.” МЧЖ авто мактаби ўргатувчи устаси Д.П. фуқаро Г.А.га ҳайдовчилик курсини ўқигани тўғрисида ҳужжат расмийлаштириб беришни ваъда қилган. Бунинг эвазига 4,5 млн сўм пулни олган вақтида ушланган.
Бундан ташқари, Деҳқонобод туманида фуқаро Л.Р. фуқаро С.У.га “Ватанпарвар” ташкилотида ишловчи танишлари ёрдамида ҳайдовчилик курсида ўқигани ҳақида тегишли ҳужжат расмийлаштириб беришни айтган. У 7,8 млн сўмни олган вақтида ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
“Права” олиб бермоқчи бўлган “уддабурон”лар
Сентябрь ойида Сирдарё вилоятининг Ширин, Навоий ва Тошкент вилоятининг Янгийўл шаҳарларида ўқув курсларига қатнашмасдан ҳайдовчилик гувоҳномасини олиб беришни ваъда қилган шахслар ушланганди.
Октябрда Тошкент вилоятининг Пискент ҳамда Оҳангарон туманларида ҳайдовчилик гувоҳномаларини олиб беришни ваъда қилган шахслар ушланган.
Ноябрь ойида Самарқанд ва Андижон вилоятларида сохта ҳайдовчилик гувоҳномаси расмийлаштириб бериш ва сертификат олиб бериш билан боғлиқ фирибгарлик ҳолати фош этилганди.
Изоҳ (0)