Respublika tashqi ishlar vaziri vazifasini bajaruvchi Abdulla Bu Habib Isroil Vazirlar mahkamasi yig‘ilishi natijalarini kutish kerakligini ta’kidladi.
Livan va Isroil o‘rtasidagi o‘t ochishni to‘xtatish haqidagi kelishuv 27-noyabrga o‘tar kechasi kuchga kirishi mumkin. Bu haqda respublika tashqi ishlar vaziri vazifasini bajaruvchi Abdulla Bu Habib ma’lum qildi.
“Biz Isroil Vazirlar mahkamasi yig‘ilishi natijalarini kutmoqdamiz. Harbiy harakatlar yarim tunda to‘xtatilishi kerak. Biz sulhga erisha olamiz, deb umid qilamiz”, dedi Abdulla Bu Habib Elnashra axborot portaliga bergan intervyusida.
Avvalroq Al Jadeed telekanali 27-noyabr, chorshanba kuni Livan bosh vaziri Najib Mikati tomonidan o‘t ochishni to‘xtatish e’lon qilinishi mumkinligi haqida xabar bergan edi. Hukumat rahbarining o‘zi bu ma’lumotni tasdiqlashdan bosh tortdi va “muzokaralar davom etayotgan paytda izoh berishdan tiyilishni afzal ko‘rishini” ta’kidladi.
Livan va Isroil AQSH vositachiligida 60 kunlik o‘tish davrini ko‘zda tutuvchi o‘t ochishni to‘xtatish kelishuvi loyihasini muhokama qilmoqda, bunda Isroil harbiylari Livan janubidan chiqib ketadi va Livan armiyasi chegara hududlariga joylashtiriladi. “Hizbulloh”ga kelsak, u o‘z qo‘shinlari va og‘ir qurollarini Litani daryosidan shimolga, chegaradan 30 km uzoqlikda olib borishi kerak bo‘ladi.
Abdulla Bu Habib xabar berishicha, kelishuv doirasida Livan hukumati janubiy chegaraga 5 ming askar yuboradi, ular BMTning Livandagi Muvaqqat kuchlari (UNIFIL) tomonidan qo‘llab-quvvatlanadi.
Izoh (0)