Исроилликларнинг камида 64 фоизи Исроил бош вазири Бенямин Нетаньяху бошчилигидаги ҳукуматга ишонмаяпти.
Бу ҳақда Исроилнинг 12-каналида ўтказилган сўров натижаларига кўра маълум қилинди.
Респондентларнинг яна 30 фоизи мамлакат ҳукуматининг амалдаги таркибига ҳали ҳам ишонишларини билдиришган.
Унга кўра, респондентларнинг 79 фоизи 2023 йил 7 октябрда ҲАМАСнинг ҳаракатлари чоғида Исроил сиёсий ва ҳарбий раҳбариятининг хатоларини текшириш бўйича давлат комиссияси тузилишини ҳам қўллаб-қувватлаган. Респондентларнинг атиги 8 фоизи бундай текширувга қарши эканини, 13 фоизи эса бир қарорга келмаганини билдирган.
Бундан ташқари, улардан Ливаннинг “Ҳизбуллоҳ” ҳаракати билан ўт очишни тўхтатиш тўғрисида келишув тузиш бўйича қарашлари ҳақида сўралган: 54 фоизи келишувни қўллаб-қувватлашини айтган, яна 24 фоизи эса бундай келишувга қарши чиққан.
21 ноябрь куни Халқаро жиноят суди Исроил бош вазири Биньямин Нетаньяху ва собиқ мудофаа вазири Йоав Галлантни ҳибсга олишга ордер берганди.
Халқаро жиноят суди хабарига кўра, судда Биньямин Нетаньяху ва Йоав Галант Ғазо секторидаги тинч аҳолини яшаш учун зарур бўлган сув, дори-дармон, озиқ-овқат, тиббий жиҳозлар, ёқилғи ва электр энергиясидан “қасддан маҳрум қилгани” борасида асослар мавжуд.
Суднинг қайд этишича, исроиллик амалдорлар инсонпарварлик ёрдамига тўсқинлик қилган ва ўз ихтиёридаги барча воситалардан фойдаланиб, тинч аҳолига ёрдам кўрсатмаган.
Халқаро жиноят судининг бу қарорига жавобан Биньямин Нетаньяхунинг идораси судни Исроилни изоляция қилишда ва мамлакатга қарши “террорчилик ҳужумларига ёрдам беришда” айблаб чиқди.
Изоҳ (0)