Жимми Дональдсон ёки Жаноб Бист (Mr. Beast) номи билан танилган YouTube блогери 2 июнь куни ўз канали обуначилари сони бўйича рекорд ўрнатди. Бу ҳақда Europa Plus нашри хабар берди. Унинг аудиторияси 270 миллионга яқин фолловерлардан иборат.
Жимми Дональдсон 1998 йил 7 майда АҚШнинг Шимолий Каролина штати, Гринвил шаҳрида туғилган. У болалигидан видео ўйинлар ва Интернетга қизиқиб келган, бу эса уни 2012 йилда ўзининг YouTube каналини яратишга олиб келди. Канални очганда Жимми атиги 13 ёшда эди.
Аввалига Дональдсон турли жанрларда ва мавзуларда видеолар яратишга ҳаракат қилди: блогер видео ўйинлар, турли маҳсулотга тавсиф ва шарҳ берди, шахсий ҳаёти ҳақида влоглар олди. Куни кеча ёввойи табиатда омон қолиш ҳақидаги видеоси бир сутка ичида 50 миллиондан ортиқ марта кўрилди.
Жимми нафақат кўнгилочар, балки эзгу ишларга илҳомлантирувчи контент яратишга ҳам эътибор қаратди. У кенг кўламли хайрия тадбирларини уюштирди, мутлақ бегона инсонларга юз минглаб доллар ҳадя қилди, тиббий операцияларни молиялаштирди ва ҳатто уйсизлар учун бошпаналар берди. Жаноб Бист Африканинг бир неча қашшоқ ерларига ташриф буюриб, у ерда сув олиш учун юзта қудуқ қаздирди ва аҳолини ичимлик суви билан таъминлади.
“Орадан олти йил ўтгач, биз ниҳоят PewDiePie учун қасос олдик”— деб ёзади Жаноб Бист ижтимоий тармоқларда.
Гап шундаки, 2019 йилда Ҳиндистоннинг Т-Series мусиқий лейбли обуначилар сони бўйича PewDiepieни ортда қолдириб, YouTube'да етакчи блогерга айланди.
Изоҳ (0)