Курск вилоятида жанг қилаётган Украина Қуролли кучлари бўлинмалари ўқ-дорилар тақчиллигига дуч келди. Бу ҳақда Тҳе Тимес хабар берди.
Ҳарбийларга кўра, Россия қарши ҳужумни бошлаган ва босиб олинган ҳудудларни ушлаб туриш қийинлашган. Улардан икки нафари Суджадан шимоли-ғарбида жойлашган қишлоқда артиллерия ҳужуми оқибатида яраланган.
“Бизнинг артиллериямиз ўт очмади. Биз яна снаряд танқислигига дуч келдик”, дейди исмини ошкор этмаган украиналик ҳарбий.
У ўзининг 11 кишилик кичик бўлинмаси қўмондонлик кутганидан ҳам ичкарироққа кириб борганини айтди.
“Биз ўзимизни кўпчиликдек кўрсатиб, у ёқ-бу ёққа югуриб юрдик. Агар рус ҳарбийлари бизнинг қанчалик оз эканимизни билганларида, улар аллақачон олдинга силжиган бўларди”, деди ҳарбий.
Шунингдек, у ресурслар етишмаслиги сабабли унинг бўлинмаси жангчилари эвакуация пунктига етиб бориш учун эмаклаб яширинишга мажбур бўлгани ва ёрдам радио орқали сўралганидан 40 дақиқа ўтиб келганини айтди. Оқибатда уч нафар ҳарбий ҳалок бўлди, икки нафари бедарак йўқолди.
“Ҳали ҳам ўша ерда бўлган йигитлар йўлбарс каби жанг қилишяпти. Бу янгиликларда кўринганидан анча мураккаб”, деди ҳарбий.
Курск вилоятидан эвакуация қилинган яна бир киши унинг 15 кишидан иборат гуруҳидан фақат беш киши фронтда худди шундай пистирмадан омон қолганини айтди.
“Биз у ерда кўплаб одамларни йўқотяпмиз”, дея тан олди у.
Уч ҳафтадан кўпроқ вақт олдин бошланган Украинанинг Курск вилоятига ҳужуми давом этмоқда. Украина армияси бош қўмондони Александр Сирскийнинг таъкидлашича, қўшинлар ҳали ҳам баъзи йўналишларда ҳаракат қилмоқда ва 1294 километр квадрат майдондаги 100 та аҳоли пунктини назорат қилмоқда.
Шу билан бирга, украинлар босиб олинган ҳудудларни сақлаб қолиш ниятида ва ҳозирда у ерда мудофаа чизиқларини қурмоқда, деб таъкидлади АҚШ Марказий разведка бошқармаси раҳбари ўринбосари Девид Коэн.
Изоҳ (0)