Франция Россияга Олимпия ўйинлари пайтида Украинага қарши ўт очишни тўхтатишни таклиф қилди. Россия Ташқи ишлар вазирлиги эса мазкур таклифга жавоб қайтарди.
Таклиф Франция президенти Эммануэл Макрон томонидан россиялик ҳамкасби Владимир Путинга қаратилган. Париж 2024-ёзги Олимпия ўйинларига мезбонлик қилади.
“Мезбон давлатнинг қоидаси, таъбир жоиз бўлса, Олимпия ҳаракати билан ҳамқадам бўлишдир. Биз Олимпия қўмитаси қарорига ҳам амал қиламиз. Қўмита Россия давлат сифатида бу ўйинларда иштирок эта олмайди, деган қарорга келган. Аммо атлетчилар оқ байроқ остида фақат спортчи сифатида қатнашиши ва мусобақаларда иштирок этиши мумкин. Албатта, спортчилардан бундай вазиятда фойдаланмасликлари учун уларнинг чиқишларини жамоавий ва диққат билан кузатиб борамиз”, — деди Эммануэл Макрон.
У бутун дунё тинчлик ва бағрикенглик хабарини эшитишини, Украина эса ўз суверенитети ва ҳудудий яхлитлигини тўлиқ тиклашини исташини таъкидлади. Шу билан бирга, Франция раҳбари руслар ҳозир Россияда ҳукмронлик қилаётган режимни қўллаб-қувватламаслигини айтди. Макрон Франция Россиядан Олимпия ўйинлари вақтида ўт очишни тўхташни сўрашини таъкидлади.
“Ҳа, биз буни сўраймиз”, — деди у.
Франция президенти аниқ таклиф ва қарорлар билан Украинага ташриф буюришини ҳам айтди.
Россия ТИВ муносабати
Россия ташқи ишлар вазирлиги расмийси Мария Захарова ўт очишни тўхтатиш таклифи ўрнига Францияни Украинага қурол етказиб беришни тўхтатишга чақирди.
“Мен Макронга тинч аҳолини ўлдириш учун ишлатиладиган қуролларни етказиб беришни тўхтатиш, шунингдек, терроризмга ҳомийлик қилишни тўхтатиш бўйича жавоб таклифи билан чиқмоқдаман”, — деди у.
Москва, шунингдек, Франция президентини Яқин Шарқдаги можаро томонларига ҳам худди шундай таклиф билан чиқишни таклиф қилади.
“Албатта, кўп нарса Франциянинг сўзларига боғлиқ”, — дея қўшимча қилди Мария Захарова.
Изоҳ (0)