Украинанинг Қозоғистондаги собиқ элчиси Пётр Врублевский Россияда қидирувга берилди ва Москва суди уни жиноий иш доирасида сиртдан ҳибсга олишга рухсат берди. Бу ҳақда “РБК” хабар берди.
Собиқ элчига нисбатан Россияда жиноий иш очилган ва у экстремист ҳамда террорчилар рўйхатига киритилган. У 2022 йилда Киев имкон қадар кўпроқ русларни “ўлдиришга” ҳаракат қилаётганини айтганди. Врублевский Россия Жиноят кодексининг 282-моддаси 2-қисмининг “а” банди (нафрат ёки адоват қўзғатиш, шунингдек, инсон қадр-қимматини камситиш) бўйича айбланмоқда. Бу 3 йилдан 6 йилгача озодликдан маҳрум қилиш тарзидаги жазони ўз ичига олади.
Москва суди Украина фуқаросини Россия ҳудудига экстрадиция қилинган ёки Россияда ҳибсга олинган пайтдан бошлаб икки ойга қамоққа олиш тарзидаги эҳтиёт чорасини танлашни қаноатлантирди.
Эслатиб ўтамиз, Украинанинг Қозоғистондаги собиқ элчиси Пётр Врублевский 2022 йил ёзида қозоғистонлик блогерлардан бирига берган интервьюсидаги баёнотлари туфайли жанжал марказида қолганди. Шундан сўнг Қозоғистон халқи ассамблеяси аъзолари унинг баёнотларини қоралаган. Кейинроқ Врублевский Қозоғистон Ташқи ишлар вазирлигига суҳбатга чақирилган. Шу билан бирга, украиналик дипломат ўзининг баёнотлари учун узр сўрагани маълум қилинган.
Сентябрда Қозоғистон ҳукумати Врублевскийни мамлакатдан чиқариб юбориш талабини қўймаганини билдирган. Элчи таътилда ва фаолиятини давом эттириш борасида Украина расмийлари билан маслаҳатлашаётгани таъкидланган.
Бироқ октябрь ойи бошида Врублевский Қозоғистонга қайтиб келгач, Россия ТИВ Қозоғистоннинг Россиядаги элчисини чақиртирган. Россия Ташқи ишлар вазирлиги вакили Мария Захарова Врублевскийнинг мамлакатда бўлишини “қабул қилиб бўлмас”лигини айтган.
Бунга жавобан Қозоғистон Ташқи ишлар вазирлиги ҳам Россия элчисини суҳбатга чақирган. Қозоғистон Ташқи ишлар вазирлиги вакили Захарованинг баёнотини шарҳлар экан, Қозоғистон ва Украина бу борада тўлиқ ўзаро тушунишга эришганини айтган.
“Украина томони буни тушуниш билан қабул қилди, уни (Врублевский) чақириб олиш бўйича келишувга эришилди. Ҳозирда Украина Ташқи ишлар вазирлигидан Остонага янги элчи тайинлаш бўйича сўров келиб тушган”, — дея хабар берган ТИВ расмийси Айбек Смадияров.
2022 йил октябрь ойида Пётр Врублевский Украинанинг Қозоғистондаги элчиси лавозимидан четлаштирилгани маълум бўлди. Тегишли фармонни Украина президенти Владимир Зеленский имзолаган.
Изоҳ (0)