Хитойнинг Чжецзян провинциясидаги Тайчжоу шаҳрида жойлашган ҳайвонот боғида ташриф буюрувчиларни ўзига жалб қилиш учун икки нафар чау-чау зотли итларни пандага ўхшатиб бўяб қўйишди, деб ёзмоқда “Правила жизни” нашри.
“Пандасимон итлар” 1—5 май кунлари ҳайвонларни сақлайдиган махсус очиқ қафасда намойиш этилди. Ҳайвонот боғига кириш ва ғаройиб кучукларни томоша қилиш учун чипталарга катталар 20 юан (35 минг сўм), болалар эса ўн юан (70 минг сўм) тўлаши керак эди. Чиптада хитой тилида “панда итлар” деб ёзиб қўйилди. Бундай маркетинг усули ҳақиқий пандаларни кўрмоқчи бўлган меҳмонларда хато тушунча уйғотиши мумкин эди.
Бироқ ҳайвонот боғи маъмурияти ҳеч қандай алдов бўлмаганини, чипталардаги сўзлар ташриф буюрувчи нимани кўришини аниқ тасвирлаб беришини ва бунинг устига кучуклар учун ҳеч қандай ортиқча тўлов қилинмаслигини таъкидлади.
Ҳайвонот боғи ходимларининг тан олишича, бундай усул боғга кўпроқ инсонларни жалб этишга ёрдам берди. Афсуски, ҳайвонот боғи пандаларни сақлаш учун мўлжалланмаган.
Ижтимоий тармоқ фойдаланувчиларнинг эътирозига сабаб бўлган иш — жониворларни пандадек бўяб қўйилганига эса улар қуйидагича изоҳ берди:
“Инсонлар ҳам сочларини бўяйди-ку. Табиий бўёқларни кучукларга нисбатан ишлатиш мумкин”.
Изоҳ (0)