Европа Иттифоқи (ЕИ) қаровсиз жониворларнинг фаровонлиги ва назоратини умумий стандарт остида мувофиқлаштиришга ҳаракат қилмоқда, дея Anadolu нашри хабар берди.
Еврокомиссия томонидан 2023 йилда тақдим этилган қонунчилик таклифи мажбурий стерилизация, микрочиплаш, рўйхатга олиш ва парвариш қилувчиларнинг малакасини ошириш каби чораларни ўз ичига олади. Европа давлатларида қаровсиз ҳайвонлар камдан кам учраса-да, ЕИ бу муаммога умумий ечим топиш бўйича чоралар кўришда давом этмоқда.
Еврокомиссия маълумотларига кўра, ҳар йили кўплаб мушуклар ва итлар Евроиттифоқ бўйлаб жамоат ёки нотижорат ташкилотларига қарашли бошпаналарда асраб олинади. Бельгияда ҳар йили 7 минг ит ва 26 минг мушук бошпаналарга ташлаб кетилган бўлса, Испанияда бу кўрсаткич 100 мингга яқин ит ва 30 минг мушукни ташкил этади.
2023 йилда Европа парламенти томонидан ўтказилган Eurobarometer ижтимоий сўровига кўра, Европа Иттифоқи фуқароларининг 74 фоизи уй ҳайвонлари фаровонлиги яхшироқ ҳимояга муҳтож, деб ҳисоблайди.
Европа комиссиясининг соғлиқни сақлаш ва озиқ-овқат хавфсизлиги департаменти матбуот котиби Анна Грэйнинг таъкидлашича, Европа комиссияси 2023 йил 7 декабрда ўз фаолияти натижаларига кўра қонунчилик таклифини тақдим этган. Қонун лойиҳасининг мақсади уй ҳайвонларини питомникларда, ҳайвонлар учун дўконларда ва бошпаналарда кўпайтириш, сақлаш ва парвариш қилиш учун Европа Иттифоқи стандартларини яратишдир. Бундан ташқари, ҳужжатда ит ва мушукларнинг ноқонуний онлайн савдосига қарши курашни кучайтириш, шунингдек, ушбу ҳайвонларни мажбурий идентификация қилиш ва миллий маълумотлар базаларида рўйхатдан ўтказишни жорий этиш орқали мониторинг олиб бориш назарда тутилган.
Ҳужжатда қайд этилишича, ҳайвонларга ғамхўрлик қилувчилар ит ва мушукларнинг биологик, физиологик ва хулқ-атвор эҳтиёжларини тушуниши ҳамда уларнинг одатларини, шу жумладан, касаллик белгиларини ҳам тан олиши керак. Бундан ташқари, тарбиячилар учун мунтазам тренинглар ўтказиш режалаштирилган.
Изоҳ (0)