Дональд Трамп 2024 йилги АҚШ президентлиги сайловларида ғалаба қозонса, Афғонистондаги Баграм аэродроми устидан Америка назоратини тиклаш бўйича “Толибон” билан “савдо битими” тузишини айтди. Бу ҳақда Daily Mail хабар берди.
Трампнинг сўзларига кўра, бу “Хитойни кузатиш учун” зарур ҳисобланади. Аёва штатида ўз тарафдорлари олдида чиқиш қилган Трамп Баграм базасининг “Толибон”га ўтказилишини хато деб атади. Унинг сўзларига кўра, Вашингтон ва “Толибон” ўртасида Доҳа келишуви айнан Трамп даврида имзоланган бўлса-да, Трамп маъмурияти Баграм авиабазаси устидан назоратни сақлаб қолишини кутган.
“Баграмни сақлаб қолмоқчи эдик. У дунёдаги энг катта базадир. Энг катта учиш-қўниш йўлаклари, энг кучли, саккиз фут чуқурликдаги бетон. У ҳамма нарсани кўтара олади, биз ундан воз кечдик. Энди сиз уни (Баграм) ким эгаллаб турганини биласиз — Хитой. Хитой уни босиб олган. Бу одамлар (Жо Байден маъмурияти) қанчалик аҳмоқ? Бу жуда ачинарли”, — деди у.
Бироқ Трамп Афғонистон билан келишувга эришиб, келаси йил қайта сайланса, Баграм аэродромини қайтариб олишни таъкидлади.
“Аммо биз уни қайтариб оламиз, балки савдо келишувининг бир қисми сифатида қайтарамиз”, — дея хулоса қилди Трамп.
Баграм аэродроми 2021 йил июль ойида яширинча эвакуация қилинишидан олдин Афғонистондаги энг йирик АҚШ ҳарбий базаси бўлган.
Изоҳ (0)