Анқара АҚШ қўшинлари Афғонистондан қандай олиб чиқилган бўлса, Сурия ва Ироқдан ҳам шундай олиб чиқилиши керак деб ҳисоблайди. Бу ҳақда Туркия президенти Ражаб Тоййиб Эрдўғон CBS телеканалига берган интервьюсида маълум қилди.
«Албатта, агар менда танлаш имкони бўлса, мен улар Афғонистонни тарк этганидек, Сурия ва Ироқни ҳам тарк этишини истаган бўлардим», — деди Эрдўғон. Унинг сўзларига кўра, агар тинчликка интилаётган бўлса, Америка ҳарбийларининг бу мамлакатларда қолиши мантиқсиз. «Биз бу халқларни, ҳукуматларни ўз ҳолига қўйишимиз мумкин, шунда улар ўзлари қарор қабул қилади», — деди президент.
Шу билан бирга, у Туркия қўшинлари мамлакатни тиклаш мақсадида Сурияда эканини таъкидлади. «Сурияда биз 100 минг уй-жой қурмоқдамиз. Одамлар, оилалар кўчирилди, ватанидан қувилди. Биз улар учун уй қуряпмиз. Бошқа мамлакатлар нима билан бандлиги менга қизиқ. Буни тушуниш жуда муҳим », — деди Эрдўғон.
Туркия президенти Вашингтон, Москва, Теҳрон ва Анқара Сурия ҳамда Ироқда тинчлик ўрнатиш учун биргаликда ишлаши мумкинлигига умид билдирди. 29 сентябрь куни Сочида Россия президенти Владимир Путин билан ўтказиладиган учрашувда ушбу масалани муҳокама қилмоқчимисиз, деган саволга Эрдўғон: «Биз бу ҳақда Путин билан гаплашяпмиз», — деб жавоб берди.
Шу ҳафта бошида Сурия Ташқи ишлар вазири Файсал Микдад Туркиядан мамлакат шимолий вилоятларидаги ҳарбийларини олиб чиқишни талаб қилди. У, шунингдек, Анқарани Суриядаги террорчи гуруҳларни қўллаб-қувватлашда айблади.
АҚШ 2003 йилда Саддам Ҳусайн ҳукуматини ағдариш учун Ироққа қўшин юборган. 2011 йилда ҳарбийлар расман мамлакатдан чиқарилди. Бироқ 2014 йилда Барак Обама маъмурияти Суриядаги фуқаролар уруши ва ИШИДнинг кучайиши фонида аскарларни қайтаришга қарор қилди.
2020 йил августда собиқ президент Дональд Трамп контингентни 3,5 минг кишигача камайтириш ниятини маълум қилди. АП хабарига кўра, шундан сўнг ҳарбийлар сони 2,5 минг кишигача камайган. Июль ойида агентлик хабар беришича, Вашингтон ва Бағдод йил охиригача АҚШ қўшинларини Ироқдан олиб чиқилишига келишган.
2018 йил декабрь ойида Трамп АҚШ ҳарбийлари Сурияни тарк этишини эълон қилганди. У ўз қарорини ИШИД жангариларининг асосий қисми мағлуб этилгани билан изоҳлади. АҚШ ҳукумати маълумотларига кўра, шу йилнинг июль ойида Сурияда 900 га яқин америкалик аскар бор эди. Пентагон қўшинларнинг олиб кетилишига ҳали эрта эди, деган фикрни билдирди, чунки ИШИД билан кураш давом этмоқда. Америка ҳарбийлари «Сурия ичкарисидаги фуқаролар уруши билан боғлиқ кенг масалалардан бошқа ишлар билан шуғулланмайди», деган эди идора вакили Жон Кирби май ойида.
Изоҳ (0)