АҚШ собиқ президенти Дональд Трамп Америка қўшинларининг унинг давомчиси Жо Байден раҳбарлиги остида Афғонистондан олиб чиқиб кетилишини «АҚШ учун энг катта ҳақорат» деб атади. Бу ҳақда Reuters хабар бермоқда.
«Байденнинг Афғонистондан омадсиз равишда кетиши — миллат етакчиси қобилиятсизлигининг, эҳтимол, бутун тарих давомидаги энг ҳайратланарли тарзда намоён бўлиши», — деди Трамп Алабамада ўз тарафдорлари қаршисида нутқ сўзлаётиб.
Собиқ президентнинг фикрича, Байден Афғонистондаги операцияни якунлаш бўйича Трамп даврида ишлаб чиқилган режадан воз кечиб хато қилган. «Оқибатда бу қўшинларни чиқариб кетиш эмас, капитуляция (таслим бўлиш) бўлиб қолди», деди Трамп.
«Биз обрў билан чиқиб кетишимиз мумкин эди, — дея қўшимча қилди Трамп. — Биз иззат-ҳурмат билан чиқиб кетишимиз керак эди. Бунинг ўрнига эса обрўнинг тескарисига эга бўлдик».
АҚШ ўзи 2001 йилдан бери ҳарбий операцияни ўтказиб келаётган Афғонистондан қўшинларини олиб кетиш ҳақида бир неча марта айтган. Қўшинларни олиб кетиш, хусусан, Трампнинг сайловолди кампанияси бандларидан бири бўлган. Аммо 2017 йил бошида АҚШ президенти лавозимини эгаллагач, Трамп Америка контингентини Афғонистондан тезкорлик билан олиб кетиш ҳақида гап ҳам бўлиши мумкин эмаслигини эълон қилди. Охир-оқибат қўшинларни олиб чиқиш АҚШнинг янги президенти — 2020 йил кузидаги президент сайловида Трамп устидан ғалаба қозонган демократ Жо Байден даврида бошланди.
Байден қўшинларни олиб кетишни 2021 йил 11 сентябрга қадар якунлашни режалаштирган эди, бироқ америкаликлар Афғонистонни тарк этишни бошлаганидан кейин дарҳол деярли бутун мамлакат «Толибон» ҳукмронлиги остига ўтди. 15 август куни ҳаракат Кобулни назорат остига олди, президент Ашраф Ғани мамлакатдан қочиб кетди. «Толибон» ҳокимият тепасига келганидан кейин минглаб одамлар Афғонистонни тарк этишга уринмоқда, Кобул аэропортида шу пайтгача камида 12 киши ҳалок бўлган.
Аввалроқ АҚШнинг Кобулдаги элчихонаси ходимлари Давлат департаментини Америка қўшинлари олиб чиқилгач, кўп ўтмай Афғонистонда ҳокимият қулаши мумкинлиги ҳақида олдиндан огоҳлантиргани маълум бўлган эди. The Wall Street Journal манбалари қайд этишича, Америка дипломатлари ўша вақтда Афғонистон ҳукумат кучлари радикалларга қаршилик кўрсата олмаслиги мумкин, деган фикрда бўлган.
Изоҳ (0)