Ҳиндистон бош вазири Нарендра Моди ҳамкорлик масаласида музокаралар олиб бориш учун Москвага боради. Бу ҳақда Ҳиндистон нашрлари тарқатган хабарларга асосланиб, CNN хабар берди.
Манбада айтилишича, Нарендра Моди Кремль қўшинлари Украинага бостириб киргандан бери Россияга илк ташрифини амалга оширади. Ташрифда Москва ва Деҳлининг ўсиб бораётган алоқаларига оид мавзулар муҳокама қилиниши айтилган.
Кремль матбуот котиби Юрий Ушаков Ҳиндистон бош вазири ташрифини тасдиқлаган. Москвада олий даражадаги ташрифга тайёргарлик кўрилаётгани айтилган. Модининг Москвага келиш санаси тез орада маълум қилиниши айтилган.
“Тасдиқлашим мумкинки, биз Ҳиндистон бош вазирининг ташрифига тайёргарлик кўряпмиз. Саналар ҳақида ҳозирча айта олмайман, чунки саналарни томонлар келишилган ҳолда эълон қилишади. Лекин биз фаол тайёргарлик кўряпмиз. Ва бу ташриф, албатта, амалга ошади”, — дейилади Кремль матбуот хизмати котиби Ушаков хабарида.
Нарендра Моди сўнгги марта 2019 йилда Россияга ташриф буюрган. Ўшанда икки мамлакат ўртасида иқтисодий ва ҳарбий ҳамкорликка чақирувчи келишувлар имзоланган эди.
Россия ва Ҳиндистон раҳбарларининг сўнгги юзма-юз учрашуви эса 2022 йилда ШҲТ саммити доирасида Ўзбекистонда бўлиб ўтган эди. Тор доирадаги суҳбатда Путин ва Моди ўзаро ҳамкорликнинг айрим жиҳатларини муҳокама қилиш билан чекланган.
Бир гуруҳ таҳлилчилар Ҳиндистон етакчиси ташрифидан мақсад БРИКСдаги алоқаларни кучайтириш бўлиши мумкинлигини билдирган. Ҳозирча Москва ҳам Ню Деҳли ҳам бўлажак учрашув тафсилотларини очиқламаган.
Изоҳ (0)