Малдив ороллари республикаси Ҳиндистондан 15 мартгача ҳарбийларини ороллардан олиб чиқиб кетишни сўради. Бу ҳақда Малдив ороллари президенти маъмуриятининг давлат сиёсати бўйича ёрдамчиси Абдулла Нозим Иброҳимга таяниб, Sun Online хабар берди.
“Ҳиндистонлик ҳарбий хизматчилар Малдив оролларида қолиши мумкин эмас. Бу президент Муҳаммад Муиззу ва ҳозирги маъмуриятнинг сиёсати”, — деди Иброҳим.
Унга кўра, республика раҳбари Ҳиндистондан 15 мартгача ҳарбийларни олиб чиқиб кетишни расман сўраган. Иброҳимнинг эслатишича, Мале ва Нью-Деҳли қўшинларни олиб чиқиш бўйича музокаралар олиб бориш учун юқори даражадаги гуруҳ тузган. Ушбу гуруҳнинг биринчи йиғилиши 14 январь куни бўлиб ўтган. Унда Ҳиндистон ҳарбийларини олиб чиқиш муддати масаласи муҳокама қилинган.
Малдив оролларида Ҳиндистоннинг 88 нафар ҳарбийси бор. Ҳиндистон ва Малдив ороллари мудофаа соҳасида 1988 йилдан бери ҳамкорлик қилиб келади, ўшанда Ҳиндистон армияси президент Мумун Абдул Гаюмнинг илтимосига биноан, унга “Тамил илам озодлик йўлбарслари гуруҳининг” тўнтаришини енгишга ёрдам берган.
Машғулотлар, жиҳозлар ва қурол-яроғ билан таъминлаш, иншоотлар қуришни ўз ичига олган ушбу ҳамкорлик 2017-2018 йилларга қадар Малдив оролларидаги барча сиёсатчилар томонидан қўллаб-қувватланган.
Малдив оролларининг амалдаги президенти Муиззу ўз сайловолди кампаниясида ҳинд ҳарбийларини орол республикаси ҳудудидан олиб чиқиб кетишга ваъда берганди.
Изоҳ (0)