Нью-Деҳли Россия Қуролли Кучларида ёрдамчи ишларга ёлланган Ҳиндистон фуқароларини муддатидан олдин ишдан бўшатиш талаби билан Москвага мурожаат қилди. Бу ҳақда мамлакат Ташқи ишлар вазирлиги расмий вакили Рандҳир Жайсвал баёнотига таяниб, Тhе Hindu хабар берди.
20 февраль куни Россия армиясида ёрдамчи ишлар учун ёлланган камида уч ҳиндистонлик Украинада Россия учун жанг қилишга мажбур бўлгани ҳақида хабар тарқалган эди.
“Биз бу ерга 2023 йил ноябрида келган эдик, биз армия хавфсизлиги бўйича ёрдамчилар сифатида хизмат шартномасини имзолашга мажбур бўлдик. Жанг майдонига юбормаслик ва 1,95 миллион лакҳ рупий (100 000 рупийни) маош ва ойига 50 000 рупий (56 000 рубль) қўшимча мукофот ваъда қилинган. Икки ой учун 50 000 рупийдан ташқари, мен ҳеч қандай пул олмаганман” — дейди жабрланганлардан бири.
Тhе Hindu нашрининг ёзишича, сўнгги бир йил ичида 100 га яқин ҳиндистонлик Россия Қуролли кучларида ишлаш учун ёлланган. Тhе Hinduга кўра, 2023 йил ноябрь ойидан бери Россия ва Украина чегарасидаги Мариупол, Харьков, Донецк, Ростов-Дон шаҳарларида 18 га яқин ҳиндистонлик қолиб кетган, баъзи маълумотларга кўра, бир киши ҳалок бўлган.
Ҳиндистон Ташқи ишлар вазирлигининг 23 февраль кунги баёнотида айтилишича, вазирлик бир нечта ҳиндистонликлар Россия армиясида ёрдамчи сифатида ишлаш учун шартнома имзолаганидан хабардор. Ҳиндистон элчихонаси мунтазам равишда Россиянинг тегишли органларига уларни муддатидан олдин ишдан бўшатиш бўйича мурожаат қилмоқда.
“Биз барча Ҳиндистон фуқароларини эҳтиёт бўлишга ва ушбу можародан узоқроқ туришга чақирамиз”, деб таъкидлади Ҳиндистон Ташқи ишлар вазирлиги.
Изоҳ (0)